ئافره‌تێن دهۆكێ زه‌نگلا مه‌ترسیێ بۆ هه‌ڤڕكێن خوه لێدا
ئه‌ڤرۆ،
تیما ئافره‌تێن یانا دهۆك قاره‌مانا وه‌رزێ بوری ب ئه‌نجامه‌كێ مه‌زن زه‌نگلا مه‌ترسیێ بۆ هه‌ڤڕكێن خوه لێدا، پشتی د یاریا خوه یا ئێكی ژ چارچووڤێ خولا پلا نایابا فۆتسالا كچان سه‌ركه‌فتنه‌كا ژ هه‌ژی ل سه‌ر مێڤانا خوه كچێن یانا سنور ئینایی ب 16 گۆلێن پاقژ، د یاریا واندا ئه‌وا دوهی ل گۆلا كولیژا چاندنێ ل باژێرێ سێمێلێ هاتیه كرن، ژلایێ خوه‌ڤه كچێن فۆتسالا گاره ده‌ستپێكه‌كا خراب تۆماركر و تووشی خوساره‌تیه‌كا مه‌زن بوو ل سه‌ر ده‌ستێ خودانێن ئه‌ردی یا ئافره‌تێن هه‌ولێرێ ب 14 گۆلان بێی به‌رامبه‌ر، دیاریا واندا ئه‌وا ل هه‌ولێرا پایته‌خت هاتیه ئه‌نجامدان.
ژلایێ خوه‌ڤه ده‌ستپێكا كچێن یانا شێخان یا باش بوو د خولا پلا نایابا كوردستانێ دا پشتی شیایی ب سه‌ركه‌فتنه‌كا گرنگ ژ باژێرێ ره‌واندۆزێ ڤه‌گه‌ڕیێت، ب سه‌ركه‌فتی ل گه‌ل مێڤاندارا خوه یانا ره‌واندۆز ب پێنچ گۆلا به‌رامبه‌ر سێ گۆلان، ژ یاریێن دی كچێن پیره‌مه‌گرۆن ب 11 گۆلان بێی به‌رامبه‌ر سه‌ركه‌فت ل سه‌ر كچێن شێروانه، خۆرمال تووشی خوساره‌تیێ بوو ل گه‌ل دووكان ب پێنچ گۆلێن پاقژ.
بۆ زانین خولا فۆتسالا كچان ل سه‌ر ئاستێ یانێن هه‌رێما كوردستانێ ب پشكداریا 11 یانا ژلایێ ئێكه‌تیا ته‌پا پێی یا كوردستانێ هاتیه رێكخستن و ل سه‌ر دو كۆما هاتنه به‌لاڤكرن، كۆما ئێكێ پێكهاتیه ژ یانا ئافره‌تێن دهۆك قاره‌مانا وه‌رزێ بوری، گاره، شێخان، ئافره‌تێن هه‌ولێر، سنۆر و ره‌واندۆز، كۆما دویێ، شێروانه، پیره‌مه‌گرۆن، دۆكان، چارقۆرنه و خۆرمال، یاریێن وان دێ ب شێوێ خول دو قۆناغ هێنه كرن، خودانا رێزا ئێكێ و دویێ یێن هه‌ر كۆمه‌كێ دێ ده‌ربازبنه قۆناغا چارگۆشا زێرین.
