ئافرهت بووینه قوربانی توندۆتیژیا ئهلكترۆنی
ههولێر، قائید میرۆ:
بهرپرسا ڕاگەهاندنا ئێكهتیا ئافرهتێن كوردستانێ، د دیدارەکێ دا بۆ ڕۆژنامەیا ئەڤرۆ دیار کر کو ئامارێن توندوتیژیێ گۆهۆڕین بسهردا هاتینه و ڤان سالێن دووماهیێ توندوتیژیا ئهلكترۆنی زێدهبوویه و ئافرهت ژی بووینه ئارمانج و پێدڤیه سهرهدهری دگهل ئامیرێن ئهلكترۆنی بهێته كرن داکو كێمتر زیان لسهر جڤاكی ههبن.
لیا سهیفهدین، بهرپرسا راگههاندنا ئێكهتیا ئافرهتێن كوردستانێ دیار كر، ههوا بهرهنگاربوونا توندوتیژیێ ل ههرێما كوردستانێ دهستپێكریە، ئێكهتیا ئافرهتێن كوردستانێ ژی بۆ ئهڤ ساله چهندین چالاكی ههنه.
لیایێ گۆت؛ دروشمێ مە یێ ئهڤ ساله یێ نێزیكه ل دروشمێ جیهانی بۆ بهرهنگاربوونا توندوتیژیێ ئهوژی راگرتنا توندوتیژیا دیجیتالی دژی ئافرهتان دێ راگرین، ههلبژارتنا ئهڤی دروشمی بۆڤێ چهندێ ڤهدگهڕیت ل جیهانێ بشێوهیهكێ گشتی ئامارێن توندوتیژیا ئهلكترۆتنی بلند بوویه.
بهرپرسا راگههاندنا ئێكهتیا ئافرهتێن كوردستانێ گۆتژی؛ نوكه ئامیرێن ئهلكترۆنی دهست بسهر ژیانا مرۆڤی دا گرتیه و ئافرهت بووینه ئارمانج و قوربانی، ب رێیا ئامیرێن ئهلكترۆنی گهف ل ئافرهتان دهێنه كرن و سفكاتی ب ئافرهتێ دهێته كرن و زانیاری و وێنهیێن كهسی یێن ئافرهتان دهێنه بهلاڤكرن، لهوڕا بڤێ رێكێ توندوتیژی ههمبهری ئافرهتێ دهێتهكرن ههتا ئافرهت یا بێدهنگ بیت و ل جیهانا دیجیتالی بهێنه دوورخستن.
لیایێ د بەردەوامیا ئاخفتنێن خۆدا دیارکر کو رێكخراوا نهتهوێن ئێكگرتی و رێكخراوێن جیهانی و ئیكهتیا ئافرهتێن كوردستانێ ژی نهڤێت ئافرهت یا بێدهنگ بیت و گۆت؛ ئهم دخوازین ئافرهت بهێنه هشیاركرن و دنیایهكا ب سلامهت یا دیجیتالی بهێته دابینكرن بۆ ئافرهتێ، ئهوژی ب رێیا خۆ پاراستنێ و سزادانا تاوانباران ژلایێ حوكمهتا ههرێما كوردستانێ ڤه، ههروهسا پێدڤیە ئهم ههموو پێكڤه هشیاری و خواندهواریهكا ئهلكترۆنی دناڤا جڤاكی دا بهلاڤ بكهین، چونكه جیهان بگشتی ب ئهگهرێ نهخواندهواریا ئهلكترۆنی یا دنالیت بتایبەت ههرێما كوردستانێ.
لیایێ ئەو چەندە ژی دازانین، گۆهۆڕین بسهر ئامارێن توندوتیژیێ دا هاتینه، بهلێ ئهڤه رامانا وێ چهندێ نادهت گۆهۆڕینا ئاماران ئاماژه بیت بۆ كێمبوونا توندوتیژیێ، بهرۆڤاژی گۆهۆڕین بتنێ لسهر جورێن توندوتیژیێ دا هاتینه.
لیایێ ئەو چەندە ژی گۆت؛ ئهگهر ئامارێن سالێن بۆری دیاردهیێن كوشتنێ بناڤێ شهرهفێ و سوتن و خۆ سوتنا ئافرهتێ و شویكرنا ئافرهتێ ب زۆری و ڤهقهتیانا كچان ژ خواندنێ هاتبنه تۆماركرن، بهرۆڤاژی ڤان سالێن دووماهیێ بسهدهمێ گۆهۆڕینێن بسهر جڤاكی دا هاتین شێوازێ بكار ئینانا توندوتیژیێ هاتیه گۆهۆڕین، ئهوژی بكارئینانا ئامیرێن پهیوهندی و سۆشیال میدیا و بابهتێن دیجیتالی جهێ توندوتیژیێن بهرێ گرتیه.
لیا سەیفەدین دیار کر کو ژبهر خراب بكارئینانا ئامیرێن ئهلكترۆنی ئامارێن توندوتیژیێ بلندبووینه، بتایبهتی ل ههرێما كوردستانێ تاكێن جڤاكی كرینه ئارمانج، ئافرهت ژی بووینه ئارمانج و گۆت؛ جورێن توندوتیژیێ هاتینه گۆهۆڕین، ل سالێن بهرێ ئهگهر جورهكێ توندوتیژیێ بلند ببیت نوكه كێمتر بوویه، بەلێ د ههمبهردا توندوتیژیا ئهلكترۆنی زێدهبوویه.
بهرپرسا راگههاندنا ئێكهتیا ئافرهتێن كوردستانێ گۆت؛ دهم پێدڤیه ههتا کو هشیاری دناڤا جڤاكێ ههرێما كوردستانێ دا بهربهلاڤ دبیت و بشێوهیهكێ ساخلهم سهرهدهریێ دگهل ئامیرێن ئهلكترۆنی بهێتهكرن.
