ئافرەتێن خودان كار پتر هەست ب هەبوونا خوە دكەن
ئەڤرۆ
بێوار حەمدی:
عایشا شەوكەت، جێگرا رێڤەبەرێ گشتی ل ڕێڤەبەریا گشتی یا رەوشەنبیری و هونەری ل دهوكێ د دیدارەكێ دا بو ڕوژناما ئەڤرو گوت: (ب دیتنا من د ڤی سەردەمی دا ڕێژا وان كەسێن ڕێگریێ ل كاركرنا ئافرەتێ دكەن گەلەك د كێمن، بەروڤاژی نها زەلام حەز دكەن ئافرەت ژی كار بكەن و هاریكاریا وان بكەن د مەزاختیێن مالێ دا و كار كرنا وێ ژ دەرڤە هاریكارە كو ئەو لژێر فشارا كارێ ماڵێ و چوار دیواران دەربكەڤیت و پتر هەست ب هەبوونا خوە بكەت وەكو ئافرەت).
عایشایێ دیار كر ژی، كاركرنا ئافرەتێ بەری نها گەلەك ئاستەنگ بو پەیدا دكرن، ئەڤجا چ ئاستەنگێن جڤاكی یان ئایینی یان ژی یێن تایبەت بن ب كەسایەتیا وێ ڤە، بەلێ پشتی سەرهەلدانێ، ئافرەتێ سەرهەلدانەكا دی ئەنجامدا ئەوژی ب ڕێكا دەركەفتن ژ مالێ و خوە ڕزگار كرن ژ هندەك قەیدێن پاشكەفتی و گۆت: (هەروەسا ڤەبونا دەرگەهێن زانكو و پەیمانگەهان فاكتەرەكێ دی بو كو كچا كورد بشێت باوەریێ بو جڤاكی چێكەت كو شیانێت وێ مەزنترن و دشێت گوهۆڕینان پەیدا بكەت)
عایشایێ ئەو چەندە ژی دیار كر، ئەو تێگەهێ د جڤاكێ مەدا بەلاڤ بوی كو دڤێت ئافرەت بتنێ كارێن ماڵێ بكەت و زارۆكان بینیت و خودان كەت، دنوكەدا ئەڤ تێگەهە هاتیە گوهۆڕین و ئافرەت و زەڵام هەردوو هەڤكاریا ئێك دكەن د ڤی ئەركی دا و گۆت: (ئەڤ چەندە بویە ئارامیەكا دەروونی بو زاروكێن وان ژی، چونكی ب ڤێ ڕێكێ پتردشێن بو زاروكێن خوە ببنە هەڤاڵ و زاروكێن وان ژی دێ چاڤ ل وان كەن و هێدی هێدی دێ جڤاك ژی ل سەر ڤی كارێ جوان گەشە كەت ).
عایشایێ دا زانین، كاركرن و ئەو مروڤێن كار دكەن گەلەك د جوان و خوشتڤی نە و هەر جهێ مروڤ لێ كار بكەت چ ئافرەت بیت یان زەڵام دڤێت بەری هەر تشتەكی كەسایەتیا خوە بپارێزیت و كارێ خوە ب جوانی و ڕاستگویی و ب وژدان ئەنجام بدەت.
