ئافرەتێن دهۆكێ دێ نڤشەكێ نوو ب ڕێیا قارەمانییا كوردستانێ ئاڤاكەت
كارگێرییا یانەیا ئافرەتێن دهۆكێ بەردەوامە ل سەر بەرهەڤیێن خوە بۆ قارەمانییا فوتسالا كوردستانێ ل سەر ئاستێ تازەپێگەهشتیان ب دەستنیشانكرنا كادرێ راهێنانێ و خرڤەكرنا 30 یاریزانان د ژیێن بچووك دا وەكو پێنگاڤا ئێكێ بۆ ئاڤاكرنا نڤشەكێ نوو ژ كچێن پارێزگەها دهۆكێ.
ل دۆر پلان و ئارمانجێن وان زنار زوبێر جێگرێ سەرۆك یانەیا ئافرەتێن دهۆكێ بۆ رۆژنامەیا ئەڤرۆ گۆت: بۆ وەرزێ نوو یێ چالاكیێن كوردستانێ و ئیراقێ ل دووڤ ئەوێ پلانا هاتییە دانان پووتەدان و ئاڤاكرنا نڤشەكێ نوو ب یاریزانێن باژێرێ خوە، لەوما د نوكە دا مە 30 یاریزانێن ژ دایكبوویێن دناڤبەرا 2005 هەتا دگەهیتە 2013ێ، بۆ پێنگاڤا ئێكێ یا دانانا نڤشەكێ نوو گرێبەست دگەل راهێنەر ئاشتی كەریم و هاریكارا وی ئیڤان فەرهاد ئیمزاكرینە، هەروەساربۆ وەرزێ ئەڤ سالە وەكو پێنگاڤا ئێكێ دێ پشكداری قارەمانییا كوردستانێ ل سەر ئاستێ تازەپێگەهشتییان كەین ئەوا بڕیارە هەڤڕكیێن وێ ل20ێ مەها بهێت دەستپێكەت.
ژلایەكێ دووڤە ناڤهاتی دیار كر تیما یانەیا ئافرەتێن دهۆك وەكو تاكە یانەیا پارێزگەها دهۆكێ پشكدارە و گۆت: لێ مەرەما مە یا سەرەكی دروستكرنا شەنگستەكێ رێكخستی و نڤشەكێ نوو و پشتگەرمی ب كچێن باژێرێ خوە كو ببنە بنیاتێ تیما مە د پاشەرۆژێ دا بۆ قارەمانیێن كوردستانێ و ئیراقێ، ئەڤ پێنگاڤە پێدڤی ب پشتەڤانیێ یە و گەشبینن دێ لایەنێن پەیوەندیدار تایبەت پارێزگارێ دهۆكێ هەڤكار و پشتەڤانێ كچێن وەرزشڤان یێن پارێزگەهی بیت.
بۆ زانین نوونەرێ یانەیا ئافرەتێن دهۆك پشكداری كۆمبوونا هۆنەری یا فیدارسیۆنا تەپا پێی یا كوردستانێ بوو، ئەوا هەشت یانە و فێرگەه بەرهەڤبووین، بڕیار هاتە دان ل 19ێ مەها بهێت پشككێشان بهێتە كرن و قارەمانی ژ 20هەتا25ێ هەمان مەه دا بەردەوامبیت ئەوا دێ ل هەولێرا پایتەخت ب شێوەیێ كۆمڤەبوون هێتە كرن، ژ رێنمایێن قارەمانیێ دڤێت یاریزانان ژ دایكبوویێ 2008ێ و ل سەر دابیت، ئەوا هەشت یانەیێن پشكدارن دێ هێنە بەلاڤكرن ل سەر دو كۆمان، تیمێن رێزێن ئێكێ و دویێ دێ دەربازبنە چارگۆشەیا زێرین، خودانێن رێزیێن ئێكێ یێن هەر كۆمەكێ دێ بەرانبەر یا خودانێن رێزێن دویێ یێن كۆمێن دی كەن و سەركەفتیێن هەردو یارییان دەربازبنە یارییا دووماهیێ، فێرگەهـ و یانەیێن پشكدار ئەو ژی، ئافرەتێن دهۆك، تلسقۆف، شارەزوور، چەمچەمال، دۆكان، هەلەبجە، رەواندۆز و فێرگەها عەباس.
