ئافرەتێن دهۆك و زاخۆ دێ ڕەواندز و سۆران مێڤان كەن
چاڤەڕێ دهێتە كرن سوبەهی ل دەمژمێر 2:30 پشتی نیڤرۆ هەڤڕكیێن گەڕا دویێ ژ قۆناغا كۆمان یا خولا فوتسالا كچان یا كوردستانێ ل سەر ئاستێ یانەیێن پلا نایاب بهێنە كرن، هەردو یانەیێن ئافرەتێن دهۆك و كچێن یانەیا زاخۆ دێ ل یاریگەهێن خوە مێڤاندارییا یانەیێن پایتەختێ هەولێرێ كەن.
ل هۆلا گرتییا چالاكیێن وەرزشی تیما ئافرەتێن دهۆك دێ مێڤاندارییا كچێن یانەیا ڕواندۆز د گرنگترین یاریێن وێ دا كەت كو دبیتە ئێكەم یاری دناڤ ئەرد و جەماوەرێ خوە دا ژ چارچووڤەیێ كۆما ئێكێ یا خولێ، ئافرەتێن دهۆكێ خودانێن ناسناڤێ وەرزێ بۆری دێ بزاڤێ كەن بەردەوامیێ بدەنە ئاست و ئەنجامێن خوە یێن باش و بگەهنە خالا شەشێ پشتی د یارییا بۆریدا سەركەفتن ل سەر مێڤاندارا خوە یانەیا چەمچەمال ئینایی ب3-2 گۆلان، لێ د بەرانبەردا یانەیا ڕواندوز شیابوو مەزنترین ئەنجام د یارییا خوە یا گەڕا ئێكێ دا بینت ب هەشت گۆلان بەرانبەر گۆلەكێ دژی كچێن یانەیا كۆیە، ژلایەكێ دووڤە یانەیا كویە دێ مێڤاندارییا چەمچەمال كەت، هەردو تیم د یاریێن خوە یێن بۆری دا تووشی خوسارەتیێ بوون و دێ بزاڤێن قەربوویا خالان و ئێكەم سەركەفتن كەن.
ژلایێ خوەڤە تیما كچێن یانەیا زاخۆ دێ ل هۆلا گرتییا زانكۆیا زاخۆ مێڤاندارییا كچێن یانەیا سۆران كەت د یارییەكا دی یا هەڤڕكی و ب زەحمەت دا ئەوا دێ ژ چارچووڤەیێ كۆما دویێ هێتە كرن، كچێن زاخۆ ئەوێن د یارییا خوە یا حەفتییا بۆری دا دگەل خودانێن ئەردی یانەیا ئافرەتێن هەولێرێ بێ گۆل وەكهەڤبوون، كچێن خابووری ل وەرزێ بۆری رێزا دویێ ب دەستڤە ئینابوو و ل وەرزێ ئەڤ سالە هیڤیێن مەزنتر هەنە ژبۆ ناسناڤی لەوما ژی دێ بزاڤێ كەن سەركەفتنا ئێكێ بۆ جەماوەرێ خوە بكەنە دیاری، هەر د ڤێ كۆمێ دا یانەیا ئافرەتێن هەولێر دێ بنە مێڤانێن كچێن یانەیا سیرۆانی هەلەبچە.
