ئافرەتێن چالاك ل دەڤەرا مە هەنە
عەزیز هەورامی:
ئارێز فەرهەنگ، كچەكا دەست رەنگینا خەلكا پارێزگەها حەلەبچەیە، د دیدارەكێ دا بۆ رۆژناما ئەڤرۆ دبێژیت: ئەڤە سێ سالن ئەز ڤی كاری دكەم و سوپاس بۆ خودێ ئەو بەرهەمێن ئەز چێدكەم داهاتەك بۆ من ژێ دهێت كو هەتا رادەیەكی دشێم هاریكاریا خێزانا خوە ژی بكەم.
ئارێزێ گۆت: نابیت ئەم د مالێ دا روونین و چو كاران نەكەین، چنكو چو كەس ژمە نینە هندەك هزرو بیر یان پرۆژە د مێشكێ وی دا نەبن، لەورا من ژی خوە دیاركر و ئەز خوە د چێكرنا هندەك كارێن دەستی دا وەك (چانتە و یاریێن زارۆیان و جلكێن ئافرەتان) و گەلەك تشێن دی دا دبینم، راستە كار یێ ب زەحمەت و مژولاهی یە، لێ دەمێ ب دووماهی دهێت خۆشیەكا دی ژێ دبینیت و هەتا رادەیەكی ئەو زەحمەت ژی دهێتە ژبیركرن، راستە ل دەمەكی ل دەڤەرا مە رێگری هەبوون و حەزنەدكرن ئافرەت شیانێن خوە دیاربكەن، لێ نوكە گەلەك باشترە و ئافرەتێن چالاك د هەر بۆارەكی دا ل دەڤەرامە كاردكەن و رێز ل وان و كارێ وان دهێتە گرتن.
