ئافرەت باشتر ژ زەلامی کارێ ڕێڤەبرنێ دکەت
بێوار حەمدی:
پێشڤەچۆنێن جڤاکی و گۆهۆڕینا ژیانێ وەکریە کو ئافرەت ل گۆرەی شیانێن خۆ بتنێ دشێت کاربکەت بەرپرسا ناڤەندا دهۆک یا ئێکەتیا ئافرەتان گۆت: د گەلەک ڤەکۆلینان دا هاتیە کو ئافرەت د بیاڤێ برێڤەبرنێ دا دەستپاکترو رێکوپێکترە ژ زەلامی وباشتر دشێت د ڕێڤەبرنێ دا کار بکەت.
خەلات جەمال، بەرپرسا ناڤەندا دهۆک یا ئێکەتیا ئافرەتان د دیدارەکێ دا بۆ ڕۆژناما ئەڤرۆ دیار کر، د کەڤندا و هەتا نوکە ئافرەتێ هەر کارەکێ هەبیت لدووڤ هێزا خۆ ئەنجام دایە و زێدەتر ژی و گۆت: گەلەک ژ وان کارێن ب زەحمەت یێن ئافرەتێ دکرن کارێن زەلامی بون، بەلێ ژبەر ئیرادەیا خۆ یا بهێز هەر کارەک دکر ژ بۆ خۆشکرنا ژیانا خێزانا خۆ.
خەلاتێ د بەردەوامیا ئاخفتنێن خودا دیار کر کو پێشڤەچۆنێن جڤاکی و گۆهوڕینا بارێ ژیانا خەلکی وەکریە کو ئافرەت ل گورەی شیانێن خۆ بتنێ دشێت کاری دەستنیشان بکەت و ئەنجام بدەت و گۆت: ئافرەتا کورد ڕێزەکا تایبەت دناڤ خێزان و جڤاکی دا هەیە، ژبەر هندێ وەکو رێزگرتن ئافرەت د هەموو کاراندا ناهێتە دیتن بتایبەت یێن کو ل لدووڤ لایەنێ وێ یێ بایولوجی نەگۆنجن.
خەلاتێ گۆتژی: د لایەنێ فەرمانبەریێ دا ئافرەت ب هەمان ئەرکێ زەلامی دشێت کار بکەت و باشتر ژی ڕێڤەبرنێ کەت، وەکو د گەلەک ڤەکولینان دا هاتی کو ئافرەت د بیاڤێ ڕێڤەبرنێ دا دەستپاکتر و ڕێکۆپێکترە ژ زەلامی.
