ئافرەت شیایە رۆلێ خوە د بازرگانیا ئەلكترۆنی دا ببینیت
دلڤین رەشید:
رێڤەبەرا رێكخراوا ڕابە ژ بۆ گەشەپێدانا ئافرەتێ و گەنجان دیار كر كو گەلەك ئافرەت هەنە ژبەر خێزانێ و زارۆكێن خۆ یان ژی نەبوونا ترومبێلێ یان هەر ئەگەرەكێ دی نەشێن ل دەرڤە كار بكەن و گۆت: لەورا كارێ ئونلاین دەلیڤەكا باشە كو ئافرەت تێدا كارێن خۆ بەرچاڤ بكەت.
هەدیا حسێن رێڤەبەرا رێكخراوا ڕابە ژ بۆ گەشەپێدانا ئافرەتێ و گەنجان بۆ رۆژناما ئەڤرۆ دیار كر، د قۆناغا نۆكە دا ل سەرانسەری جیهانێ ژ ئەگەرێن جۆرا و جۆر مفا ژ دەمێ ڤالا دهێتە وەرگرتن ژ بۆ هزر كرن یان ژی پرۆژەیێن بچووك ب تاكە كەسی ڤە كو بخۆ تێدا كار بكەن ب رێكا سوشیال میدیایێ كو كەل و پەلێن پێدڤی ب رێكا ئونلاین ب فرۆشنە فرۆشیارێن خوە ب مەرەما قازانجكرنێ.
هەدیایێ گۆت: (كوردستان ژی ژ ڤی جۆرە كاری یا بێ بەهر نەبویە ب تایبەت ژی ئافرەتا كورد شیایە ب شێوەیەكێ سەركەفتی رولێ خوە د بازرگانیا ئەلكترونی دا ببینت).
رێڤەبەرا رێكخراوا ڕابە ژ بۆ گەشەپێدانا ئافرەتێ و گەنجان دیار كر ژی، كاركرنا ئونلاین ژ بۆ ئافرەتێ، بتایبەت ژی د قۆناغا نۆكە دا كو سەردەمەكە بەشەكێ مەزن ژ مرۆڤان د وێ باوەریێ دانە یەكسانی د كاركرنێ دا هەبیت ب تایبەت دناڤ جڤاكێ كوردی دا بێی جوداهیا رەگەزی و گۆت: (هەر د چارچۆڤێ كاركرنێ دا ئافرەت د كارێ ئۆنلاین دا بیت یان ژی دناڤ هەر دەزگەهەكێ و رێڤەبەریەكێ دا بیت گرنگی و تایبەتمەندیا خۆ هەیە ژ بۆ دروستبوونا ئابورەكێ سەربەخۆ، گەلەك یا گرنگە رێك بهێنە ڤەكرن ژبۆ دروستكرنا دەلیڤێن كاری بۆ ئافرەتان ب تایبەت ئافرەتێن خودان شیان ).
هەدیایێ ئەو چەند ژی دیار كر، گەلەك ئافرەت هەنە ژبەر زارۆك و خێزانا خۆ یان ژی نەبوونا ترومبێلێ و هەر ئەگەرەكێ دی نەشێن ل دەرڤە كار بكەن، لەورا كارێ ئونلاین دەلیڤەكا باشە كو ئافرەت تێدا كارێن خۆ بەرچاڤ بكەت و شیانێن خۆ دیار بكەت و گۆت: (چونكی ل جیهانێ و كوردستانێ ب خۆش بەختانە تەكنەلۆجیا گەلەك باش بەر ب پێشڤە چۆیە و خەلك زێدەتر هشیار بوویە ژ بۆ داخواز كرن و كرین و فرۆتنێ ب ئۆنلاین ئەڤە ژی دەرفەتەكا باشە ژ بۆ پێشخستنا كارێ ئافرەتێ د هەر بوارە كی دا كو ئافرەت ببیتە خودان كارێ خۆ یێ سەربەخۆ).
