ئاكرێ ب هێزه‌كا نوو دێ ڤه‌گه‌ڕێته خولا كوردستانێ
ئه‌ڤرۆ، قه‌یس وه‌یس
تیما ته‌پا پێی یا یانا ئاكرێ د دووماهی پێنگاڤا خوه دا گرێبه‌ست ل گه‌ل سێ یاریزانێن نوو ئیمزاكرینه ئه‌وژی پیشه‌كارێ كامیرۆنی تامۆ تینۆ، چیا نازی و ئۆرهان نه‌جات ژبۆ باشترین به‌رهه‌ڤی بۆ وه‌رزێ نوو یێ خولا پلا نایابا كوردستانێ ئه‌وا دهێته چاڤه‌ڕێ كرن پێنچ شه‌مبیا بهێت ئاكرێ یاریا خوه یا ئێكێ ژ ده‌رڤه‌یی یاریگه‌ها خوه هه‌مبه‌ری پێشمه‌رگه‌یا هه‌ولێرێ بیت.
هوزه‌ڤان زاهد سه‌رپه‌رشتێ تیما ئاكرێ بۆ رۆژناما ئه‌ڤرۆ گۆت: بۆ وه‌رزێ نوو تیما مه دێ ب هێز ڤه‌گه‌ڕیێت و هه‌ر ژ ده‌ستپێكا به‌رهه‌ڤیێن مه دۆپاتی ل سه‌ر باشترین شێوه بۆ خولێ به‌رهه‌ڤبین وه‌كو كارگێریا یانێ هه‌ر تشته‌كێ پێدڤی ل دووڤ شیانێن خوه بۆ تیمێ هاتینه به‌رده‌ست كرن كادرێ راهێنانێ شاره‌زا و دیسان ئینانا چه‌ند یاریزانێن سه‌ربۆر و شیان هه‌ین ژوانا پیشه‌كارێ كامیرۆنی تامۆ تینۆ، هه‌روه‌سان هێرشبه‌رێ باژێرێ زاخۆ چیا نازی و ئۆهان نه‌جات، مه‌حموود شاكر، فرهاد سه‌بری، هه‌وره‌مان رزگار و حه‌ته‌م عه‌بدولخالق، دیسان كۆمه‌كا باش یا یاریزانێن خه‌لكێ ئاكرێ كو دێ هێزه‌كا باش ده‌ته تیمێ و گه‌شبینن بۆ باشترین شێوه بهێنه دناڤ هه‌ڤڕكیێن خولێ دا.
ژلایه‌كێ دووڤه ناڤهاتی ره‌وشا دارایی یا یانێ ب خرابی دا دیاركرن و گۆت: سه‌رباری سه‌ره‌دانا د. عه‌لی ته‌ته‌ر پارێزگارێ دهۆكێ بۆ یاریگه‌ها مه گه‌شبینیه‌ك په‌یداكربوو ب چاره‌كرنا فریزه‌یێ یاریگه‌هێ لێ هه‌تا نوكه ئه‌و سۆز نه هاتیه بجه ئینان و لایه‌نێ دارایی ژی یانه د ئاسته‌كێ خراب دایه و دبیت كارتیكرنا نه‌رێنی ل سه‌ر كاروانێ تیمێ بكه‌ت.
