ئالان سترانان بۆ دلێ خوە دبێژیت
ئەڤرۆ
هەرهین محەمەد:
سترانبێژێ گەنج ئالان سلێمان د دیدارەكێ دا بۆ بەرپەرێ هونەری یێ رۆژناما ئەڤرۆ دیار كر كو نوكە ئەو مژوولی تۆماركرنا سێ سترانایە و یێ ل سەر كاردكەت و ژڤانە ل دەمەكێ نێزیك بهێنە بەلاڤكرن.
ئالانی گۆت: گەلەك حەز ژ سترانێن ئەڤینی دكەم ب تایبەت یێن هونەرمەند عەبدولقەهار زاخۆلی و عەبدولواحد زاخۆلی و تەحسین تاها و ئەیاز و ئەردەوان و بلند ئیبراهیم و هەموو دەمان سترانێن ڤان هونەرمەندان دبێژم، ژ بەر كو سترانێن هونەرمەندێن نەمر هەر دخوەشن و خەلك گوهداریا وان دكەت و سترانان بۆ بدەستڤەئینانا داهاتی نابێژم، چونكو من كارێ خوە هەیە و ل گەل هندێ ژی كارێ ستران گۆتنێ دكەم و كلیپان چێدكەم و دكەمە دیاری بۆ حەزژێكەر و هەڤالێن خوە و ئەز گەلەك یێ نێزیكی ستران گۆتنێ بوویم، ژ بەر كو د مالا خالێ من دا مۆزیكژەن هەبووینە و خالێ من كەمانجە دژەنی و خالێ دایكا من زرنا دژەنی، ئانكو ل گەل مۆزیكی مەزن بوویمە.
ناڤهاتی ئاماژە دا وێ چەندێ كو هەتا نوكە هەشت كلیپ هەنە و سەرەرایی ڤێ چەندێ مۆزیكا هندەك سترانێن هونەرمەندێن وەغەركری ژی نووكریە.
