ئامیره‌یێن چاندنێ بۆ جۆتیاران دێ هێنه دابینكرن
هه‌ولێر، سولین سلێمان:
حكومه‌تا هه‌رێما كوردستانێ وه‌ك پشته‌ڤانی بۆ جۆتیاران، ئامیره‌یێن چاندنێ ب شێوێ قستێن دۆمدرێژ بۆ جۆتیاران دێ دابین كه‌ت، داكو بشێن به‌رده‌وامیێ ب كارێ خوه بده‌ن و به‌رهه‌مه‌كێ باشتر به‌رهه‌م بینن.
حوسێن حه‌مه كه‌ریم، په‌یڤدارێ وه‌زاره‌تا چاندن و ژێده‌رێن ئاڤێ یا حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، وان وه‌كو وه‌زاره‌ت داخواز ژ كۆمپانیان كریه گرێبه‌ستان ل گه‌ل وان بكه‌ن بۆ دابینكرنا ئامیره‌یێن چاندنێ بۆ جۆتیاران و گۆت: “هه‌ر كۆمپانیه‌كا چ ناڤخوه‌یی یان بیانی بڤێت پشكدار بیت، د ئینانا وان ئامیره‌یان دا بۆ هه‌رێما كوردستانێ، دشێت ناڤێ خوه تۆمار بكه‌ت و رۆژا 8ی هه‌یڤا بهێت دووماهی ژڤانه، پشتی كارێن گرێبه‌ستان تمام دبن دێ ده‌ست ب به‌لاڤكرنا وان ئامیره‌یان كه‌ین ل دووڤ پێدڤیێن جۆتیاران”.
گۆتژی: هه‌تا نوكه پتر ژ 13 هزار جۆتیاران ناڤێ خوه ژ بۆ كڕینا ڤان ئامیره‌یان نڤێسینه، پێشه‌كی 20% ژ جۆتیاران دێ هێته وه‌رگرتن و پارێ دی دێ بیته قستێن درێژ، ئێنانا ئامیره‌یان ژی دێ ل سه‌ر داخوازیێن جۆتیاران بیت، هه‌ر جۆتیاره‌كێ ئامیره‌یه‌كی بخوازیت دێ بۆ هێته دابینكرن، دیسا هه‌ر جۆتیاره‌ك ژی ئه‌گه‌ر بهایێ ڤان ئامیره‌یان ب دلی نه‌بیت دشێت نه‌كڕیت”.
