ئامێديێ: 50% ژ نەخوشێن دومدرێژ نەھاتینە تومارکرن
ئەڤرۆ نیوز، نەوزاد ھلۆری:
ل سنوورێ قەزا ئامێدیێ و دچارچوڤێ نەخۆشخانا ئامێدیێ دا، پشکەکا تایبەت ب نەخۆشێن دومدرێژ ھەیە و دەفتەر و چارەسەریێن پێدڤی بو وان نەخۆشخان دھێنە چێکرن ئەڤێن کو توشی نەخۆشێن دومدرێژ بوی، رێڤەبەرێ نەخۆشخانا ئامێدیێ ژی دیارکر کو ھەتا نوکە سێ ھزار کەسێن توش بوی ب ئێک ژ نەخۆشێن دومدرێژ ل دەڤ وان ھاتینە تومارکرن.
دکتور محەمەد ئەحمەد، رێڤەبەرێ نەخۆشخانا ئامێدیێ بۆ ئەڤرۆ نیوز گۆت: (نەخۆشخانا ئامێدیێ ئێکە ژ وان نەخۆشخانێن ھەری گرنگ ل قەزا ئامێدیێ کو بەردەوام خزمەتا نەخۆشان ب تایبەتی نەخۆشێن دومدرێژ دکەت، ل پشکا نەخوشیێن دومدرێژ فایلێن تایبەت ھاتینە چێکرن و تێدا داتا و پشکنین و ھەر تشتەکێ گرێدای وان نەخۆشان ڤە ھاتینە تومارکرن و ھەموو سەرێن ھەیڤان چارەسەری و دەرمانێن پێدڤی بو دھێنە دابینکرن).
زێدەتر گۆت: (پێشتر ھندەک رێکخراوا چارەسەری و دەرمان بۆ نەخۆشێن دومدرێژ دابین دکرن، بەلێ نوکە وەزارەتا ساخلەمیێ دابین دکەت، ھەر نەخۆشەکێ دەفتەر بۆ ھاتینە چێکرن و ھەر نەخۆشەک ژی نێزکترین بنگەھێ ساخلەمیێ پشکا خوە وەردگریت).
ب گورەی ئاخفتنێن رێڤەبەرێ نەخۆشخانا ئامێدیێ ل سنوورێ قەزا ئامێدیێ سێ ھزار نەخۆشێن دومدرێژ ھاتینە تومارکرن، بەلێ 50%ی نەھاتینە تومارکرن و زێدەتر گۆت: (پرانیا نەخۆشێن دومدرێژ ل سنوورێ قەزا ئامێدیێ پێکدھێن ژ نەخۆشێن شەکرێ و دلی و فشارێ، بەلێ ل گەل ھندێ ژی نەخوشێن دومدرێژ یێن خودە و ھورمونات و چەند جورەکێن دن ژی ھەنە، ئەو نەخوشێن کو نەخوشیێن دومدرێژ ھەیی و ل ئامێدیی َنەھاتینە تومارکرن، دبنە دوو پشک، پشکەک دبیت ل دەرڤەیێ ئامێدیێ ھاتبنە تومارکرن و پشکا خوە وەربگرن، پشکەک ژی دبیت ھێشتا نەزانن کا گرنگی یا خوە تومارکرنێ چەندە، لەورا گرنگە ئەو ژی بھێنە تومارکرن).
