ئانار به‌رواری دێ به‌رهه‌مێ خوه یێ ئێكێ به‌لاڤ كه‌ت
ئه‌ڤرۆ، زنار تۆڤی:
سترانبێژێ گه‌نج ئانار به‌رواری، نوكه ل باژێرێ دهۆكێ دژیت، د دیداره‌كێ دا بۆ رۆژناما ئه‌ڤرۆ دیار كر: ل سالا 2015 وی ده‌ست ب كارێ سترانگۆتنێ كریه، هه‌ر چه‌نده هند رێیا سترانگۆتنێ ل به‌ر وی یا خوه‌ش نه‌بوو، لێ ئه‌و یێ رژد بوو ل سه‌ر سترانگۆتنێ، هه‌روه‌سا ب هه‌ڤكاریا هه‌ڤال و كه‌سوكارێن خوه، دیسان ب پشته‌ڤانیا چه‌ندین سترانبێژێن دهۆكێ زاخۆ، ئه‌و شیا سترانان بێژیت و به‌رده‌وامیێ بده‌ته كارێ خوه، د هه‌مان ده‌م دا چه‌ندین مۆزیكژنان ژی ب تایبه‌تی ژی مامێ وی یێ موزیكژه‌ن و لێده‌رێ سازێ نزار میكائیلی گه‌له‌ك پشته‌ڤانی لێكریه.
ناڤهاتی ئه‌و ژی گۆت: نوكه ئه‌و قوتابیه ل قووناغا دووماهیێ ل په‌یمانگه‌ها گه‌شتوگۆزاری، ئه‌و حه‌ز دكه‌ت خوه فێری ژه‌نینا مۆزیكێ بكه‌ت، گه‌له‌ك جاران ژی ئه‌و خوه ب نڤێسینا سترانان و گوهداریكرنا سترانێن كوردی ڤه مژوول دكه‌ت، نوكه ئه‌و یێ به‌رهه‌ڤیان بۆ تۆماركرنا به‌رهه‌مێ خوه یێ ئێكێ دكه‌ت و دێ به‌رهه‌مه‌كێ ب شێوێ ماشۆپ به‌لاڤ كه‌ت، دێ وی به‌رهه‌می كلیپ ژی كه‌ت، وی په‌یڤ و ئاواز ژی بۆ خوه په‌یدا كرینه و ب تنێ تۆماركرن یا مای، ل ڤان نێزیكان دێ وی به‌رهه‌می به‌لاڤ كه‌ت.
ئاناری ئه‌و چه‌ند ژی خویا كر كو ئه‌و پتر حه‌ز ژ سترانێن فولكلۆری دكه‌ت و دیسان ئه‌و گوهداریا ده‌نگێ هه‌ر دو سترانبێژان دیار حه‌سه‌نی و سه‌ربه‌ست مالتایی دكه‌ت و گۆت: “من دڤێت ب رێیا ده‌نگ و سترانێن خوه خزمه‌تا هونه‌رێ خوه و ملله‌تێ خوه بكه‌م، دیسان من لبه‌ره بۆ سالا بهێت سترانه‌كێ ل سه‌ر جه‌ژنا نه‌ورۆزێ دروست بكه‌م و كلیپ بكه‌م”.
