ئاهێن خوارنێ ل دووڤ ئەنجامێن سەرژمێریێ دێ هێنە بەلاڤكرن
هەولێر، قائید میرۆ:
بەرپرسەكێ وەزارەتا بازرگانیا هەرێما كوردستانێ ئاشكرا كر، سەرژمێریا گشتی دێ بیتە بنەما بۆ بەلاڤكرنا ئاهێن خوارنێ و كەسێن داهاتێ وان زۆر دێ هێنە لادان.
حسێن سەبری، نوونەرێ هەرێما كوردستانێ ل وەزارەتا بازرگانیا ئیراقێ بۆ رۆژناما ئەڤرۆ دیار كر، سەرژمێری دێ بیتە بنەما بۆ چێكرنا پلێتا ئاهێن خوارنێ و وەرگرتنا فۆرما ئاهێن خوارنێ د دەمێ سەرژمێریێ دا بۆ كۆمكرنا زانیاریانە ل دۆر رەوشا خێزانێ و گۆت: «سێ سالە بڕیار هاتیەدان، كەسێن داهاتێ وان زۆر بهێنە لادان، پشتی ئەنجامێن سەرژمێریێ دەردكەڤن دێ كار ل سەر هێتە كرن، هەر خێزانەكا داهاتێ وێ یێ هەیڤانە یێ باشبیت دێ ژ بەهرا ئاهێن خوارنێ یێن مەهانە هێتە بێ بەهركرن، چونكی ئەو پشكا خورانێ یا مەهانە دهێتە بەلاڤكرن بۆ خێزانێن زەنگین نینە».
ل دۆر كوالێتیا پشكا ئاهێن خوارنێ حسێن سەبری گۆت: «چەندین جاران وەزارەتا بازرگانیا هەرێما كوردستانێ داخوازكریە، كوالێتیا ئاهێن خوارنێ بهێتە باشكرن، بەلێ بازرگانیا ئیراقێ دبێژیت: ئاهێن خوارنێ یێن دهێنە بەلاڤكرن، ل گورەی ستانداردێن ئیراقینە و پشكنین بۆ دهێتە كرن، ل گورەی ئەو بودجا هاتیە دیاركرن، ئاهێن خوارنێ دهێنە كڕین».
