ئاواره‌بوون.. برینه‌كا هه‌ر و هه‌ر ل سه‌ر له‌شێ جیهانێ
دلدار محه‌مه‌د
ئه‌م ژ مالبچویكی ده‌ركه‌فتین
و ل سه‌ر عه‌ردی ئه‌م ئاواره
ئه‌م زارۆك بووین
یاریكێن مه دگه‌ل گوله‌یا بوون
دگه‌ل تۆپا بوون
دگه‌ل ده‌نگێ فرۆكه‌یا بوون
ئه‌م ئاواره.
ل بن ڤی سیمه‌ی… ل بن وی سیمه‌ی
تژی دلێ مه ڤیانا ئاخێ .. ڤیانا دۆزێ
و ئه‌م ئاواره.
په‌یڤێن زمانی ژ مه ستاندن زمانێ خوه ب زۆری دانا
د مێشكێ مه دا
ته‌ڤ خه‌ونێن مه ل به‌ر سروودا سه‌پاندنێ گوهشاندن
و ئه‌م ئاواره
دلبه‌رێن مه ب زۆری برن .. ئه‌م ئاواره
دلدارێن مه ب خه‌نجه‌را غه‌درێ مرن
ئه‌م ئاواره
ل ڤی كوژی ئه‌م ئاواره .. ل وی كوژی ئه‌م ئاواره
گه‌نجینی بۆری ، سه‌رێ مه بو كه‌ڤیا به‌فرێ و ئه‌م ئاواره
بێژه جیهان!
ما كوژیكه‌كێ ته مایه ئه‌ز تێدا نه‌بوویم ئاواره؟!
ل بیرا میلێن ده‌مژمێرێ نینه
چركه‌ك هه‌بیت
دوستینیا
مه و خیڤه‌تێ
دوستینیا مه و سنۆران
رۆندكان
و خوینه‌لوییا پیان ڤه‌قه‌تیا بیت
ما ئه‌ڤه چه‌ند جاران هه‌مبێزا ته
مرن كره هه‌ڤالجێمكا هه‌بوونا مه؟!
به‌سه ده‌ستان ژڤێ ل خوه زڤرینا بێ رامان به‌رده
هه‌ما بۆ جاره‌كێ ب تنێ ل من ژی بزڤره
ده‌رگه‌هێن خوه یێن دائێخستی ل من ڤه‌كه
ما هه‌تا كه‌نگی دێ خه‌ونێن من
وه‌ك هیڤیێن پاكێن باپیرێ من كه‌یه گۆری؟
هه‌تا كه‌نگی دێ نالینێن گومتلێن ڤێ ئاخێ ل به‌ر
ده‌رگه‌هێ گوهێن ته‌یێن كه‌ڕ بنه رێز ، ده‌ست ڤالا زڤرن
جیهان
من دڤێت
به‌ر ب گۆرستانێ ڤه بچم
لێ د ترسم
ئاخا وێ ژی من وه‌رگریت
وه‌ك ئاواره.
