ئاژانسه‌كا رۆسیا: قۆناغه‌كا نوو ل سووریێ ده‌ستپێكریه
ئه‌ڤرۆ:
ئاژانسه‌كا رۆسیا دیار دكه‌ت كو ئێرشا ل عه‌فرینێ ژ ئالیێ فرۆكێن شه‌ری یێ رۆسیا ڤه هاته كرن و رۆسیا دڤێت هه‌موو ئاخا سووریێ جاره‌كا دی بكه‌ڤیته ژێر ده‌ستهه‌لاتا شامێ، ژ به‌ر هندێ ژی دڤێت توركیا هه‌موو هێزێن خوه ژ ئاخا سووریێ ڤه‌كێشیت.
ئاژانسا سپوتینگ یا رۆسیا د راپۆرته‌كێ دا دیار كر كو به‌رپرسێن رۆسیا وه‌سا دبینن كو توركیا خیانه‌ت ل رۆسیا كریه، چونكو رێككه‌فتنا رۆسیا ل گه‌ل توركیا ل دۆر سووریێ بۆ هندێ بوویه كو رۆسیا و توركیا پێكڤه شه‌رێ تیرۆرستان بكه‌ن لێ توركیا به‌رۆڤاژی رێككه‌فتنێ كار كریه و پشته‌ڤانیێ ل رێكخراوێن تیرۆرستی ل سووریێ دكه‌ت، ژ به‌ر هندێ ژی توركیا وه‌كو هۆشداری ئێرشی كه‌مپا راهێنانێ یا چه‌كدارێن سه‌ر ب توركیا ل گوندێ ئیسكا یێ سه‌ر ب عه‌فرینێ كر كو د ئه‌نجاما ئێرشی دا گه‌له‌ك چه‌كدارێن سه‌ر ب توركیا هاتنه كوشتن و هنده‌ك ژی بریندار بووینه.
هه‌مان ئاژانسا رۆسی ئاماژه ب هندێ ژی كریه كو د ڤان رۆژێن دووماهیێ دا ئێرشێن ل دژی سه‌ربازێن توركیا ل بابێ و ده‌ڤه‌رێن دی یێن سنۆری زێده بووینه و ئه‌و یه‌ك ژی نیشا دده‌ت كو ئێدی خه‌لكێ سووریێ ژی دخوازن توركیا هێزێن خوه ژ ئاخا وان ده‌رخینیت، ژ به‌ر هندێ ژی قۆناغه‌كا نوو ل سووریێ ده‌ستپێكریه و توركیا یا نه‌چاره كو رێزێ ل سه‌روه‌ریا ئاخا سووریێ بگریت و هه‌موو هێزێن خوه ژ ئاخا سووریێ ڤه‌كێشیت و ده‌ستان ژ پشته‌ڤانیكرنا چه‌كدارێن تیرۆرست ژی به‌رده‌ت.
ئه‌و یه‌ك د ده‌مه‌كێ دایه كو حه‌فتیا بۆری په‌رله‌مانتاره‌كێ رۆسیا ژی دیار كربوو كو ئێدی ده‌م یێ هاتی ره‌وشا سووریێ ئارام بیت، ئه‌مریكا ژی پشته‌ڤانیێ ل ئارامیا ره‌وشا سووریێ دكه‌ت، ژ به‌ر هندێ ژی دڤێت توركیا ده‌ست ب ڤه‌كێشانا هێزێن خوه ژ ئاخا سووریێ بكه‌ت، چونكو توركیا شه‌رێ تیرۆرستان ناكه‌ت، توركیا دڤێت ب به‌هانا تیرۆرێ ئاخا سووریێ داگیر بكه‌ت ئه‌و یه‌ك ژی ب چو ره‌نگه‌كێ ناهێته قه‌بوول كرن، هه‌تا هێزێن سه‌ر ب توركیا ل سووریێ بن ره‌وشا وی وه‌لاتی ژی ئارام نابیت، دڤێت توركیا رێزێ ل ئیرادا خه‌لكێ سووریێ بگریت و هێزێن خوه ژ وی وه‌لاتی ڤه‌كێشیت و هه‌روه‌سا رۆسیا داخواز ژ توركیا ژی كریه كو ئێدی ده‌ستان ژ پشته‌ڤانیكرنا چه‌كدارێن تیرۆرست ژی به‌رده‌ت، چونكو هه‌بوونا وان چه‌كداران بوویه ئاریشه‌كا گه‌له‌ك مه‌زن بۆ سووریێ و هه‌موو رۆژهه‌لاتا ناڤین.
چاڤدێرێن سیاسی ژی دیار دكه‌ن كو ناكۆكیێن رۆسیا و توركیا ل دۆر سووریێ گه‌له‌ك دژوار بووینه، چونكو رۆسیا و ئه‌مریكا سه‌باره‌ت ب سووریێ رێككه‌فتینه و هه‌ر دو وه‌لاتێن زلهێزێن جیهانێ دخوازن پرسا سووریێ دور ژ شه‌ری و ب رێیا دانوستاندنان بهێته چاره‌سه‌ركرن، ژ به‌ر هندێ ژی به‌ری نها شانده‌ك ژ رێڤه‌به‌ریا كوردێن رۆژئاڤایێ كوردستانێ ژی سه‌ره‌دانا رۆسیا و ئه‌مریكا كرن و هه‌ر دو وه‌لاتان ژی پشته‌ڤانیا خوه بۆ مافێن كوردان ل سووریێ دیار كرینه و داخواز ژ به‌شار ئه‌سه‌دێ سه‌رۆكێ رژێما سووریێ ژی كرینه كو ده‌ست ب گوهۆرینان بكه‌ت.
ل ئالیێ دی به‌شار ئه‌سه‌د ژی حه‌فتیا بۆری راگه‌هاند كو وان دڤێت ده‌ست ب گوهۆرینان بكه‌ن، سووریێ دڤێت ده‌ستهه‌لاتا پارێزگه‌هان زێده‌تر بكه‌ت و رێزێ ل داخوازیێن خه‌لكی ژی دگریت، چونكو سووریێ تووشی قه‌یرانه‌كا مه‌زن هاتیه و دڤێت ب رێیا دانوستاندنان هه‌موو ئاریشێن هه‌ی بهێنه چاره‌سه‌ركرن.
ئالیێ كوردی ژی پێشوازی ل هه‌لوه‌ستێ به‌شاری كرن و دیار كرن كو ئه‌و به‌رهه‌ڤن ل گه‌ل شامێ ده‌ست ب دانوستاندنان بكه‌ن، لێ دڤێت شام دانپێدانێ ب رێڤه‌به‌ریا خوه‌سه‌ر یا باكورێ سووریێ دانێت و ده‌ستان ژ سیاسه‌تا خوه یا به‌رێ ل دژی كوردان به‌رده‌ت.
