ئاژانسه‌كا رۆسی:هه‌تا رۆسیا رازی نه‌بیت توركیا نه‌شێت ده‌ست ب چو ئۆپه‌راسیۆنان بكه‌ت
ئه‌ڤرۆ:
ئاژانسه‌كا رۆسیا دیار دكه‌ت كو به‌رپرسێن وه‌زاره‌تا ده‌رڤه یا رۆسیا به‌ری چه‌ند رۆژان ژی هۆشداری داینه توركیا كو ده‌ست ب چو ئۆپه‌راسیۆنان نه‌كه‌ت، چونكی هه‌ر ئۆپه‌راسیۆنه‌كا نوو یا توركیا دێ بیته ئه‌گه‌رێ ئالۆزبوونا ره‌وشا باكورێ سووریێ و داخواز ژ توركیا هاتیه كرن كار بۆ چاره‌سه‌ریه‌كا سیاسی بكه‌ت.
ئاژانسا سپۆتینگ یا رۆسی د راپۆرته‌كێ دا به‌حسێ هندێ كریه كو به‌ری چه‌ند رۆژان ژی د ئاستێ بلند دا توركیا و رۆسیا كۆمبووینه و د كۆمبوونێ دا به‌رپرسێن رۆسیا هۆشداری داینه توركیا كو ده‌ست ب چو ئۆپه‌راسیۆنان ل باكورێ سووریێ نه‌كه‌ت، چونكی نها ره‌وشا باكورێ سووریێ تا راده‌یه‌كێ ئارامه و هه‌كه توركیا ده‌ست ب ئۆپه‌راسیۆنه‌كا سه‌ربازی بكه‌ت دێ ره‌وش پتر ئالۆز بیت و دڤێت توركیا باش بزانیت كو هه‌ر ئالۆزیه‌ك ل سه‌ر سنۆرێ وێ روو بده‌ت دێ كاریگه‌ریه‌كا خوه یا خراب بۆ توركیا ژی هه‌بیت و دڤێت توركیا كار بۆ چاره‌سه‌ریا سیاسی ل سووریێ بكه‌ت، ژ به‌ر هندێ ژی نها د ئاستێ وه‌زاره‌تا ده‌رڤه یا رۆسیا دا كار بۆ كۆمبوونه‌كا سێ قۆلی د ناڤبه‌را ئه‌ردۆغانی ل گه‌ل به‌شاری و پۆتینی دا دهێته كرن.
هه‌مان ئاژانسێ ئه‌و یه‌ك ژی دیار كریه كو ده‌مه‌كه ئه‌ردۆغانی دڤێت ل گه‌ل به‌شاری كۆمبیت، توركیا دڤێت خوه ژ بابه‌تێ په‌نابه‌رێن سووری قورتال بكه‌ت، ژ به‌ر هندێ ژی توركیا داخواز دكه‌ت كو په‌نابه‌رێن سووری ل ده‌ڤه‌ره‌كا ئارام یا ل سه‌ر سنۆرێ وێ ل گه‌ل سووریێ ئانكۆ د ناڤ ئاخا رۆژئاڤایێ كوردستانێ دا بهێنه بجهكرن كو ئه‌و یه‌ك ژی ژ ئالیێ كوردێن سووریێ ڤه ب سالانه دهێته ره‌تكرن، لێ هه‌تا نها ژی ئه‌ردۆغان یێ رژده كو داخوازیێن خوه ب سووریێ و رۆسیا بده‌ته قه‌بوول كرن، لێ هه‌تا نها ژی ئه‌و یه‌ك ژ ئالیێ رۆسیا ڤه نه‌هاتیه قه‌بوول كرن.
چاڤدێرێن سیاسی ژی دیار دكه‌ن كو دبیت ڤێجارێ ب ناڤبژیڤانیا رۆسیا هه‌ر دو وه‌لات ل سه‌ر هنده‌ك خالان بگه‌هنه رێككه‌فتنه‌كێ، ب تایبه‌تی ژی بابه‌تێ په‌نابه‌ران و گرۆپێن چه‌كدار، چونكی ب سالانه سووریێ داخواز ژ توركیا دكه‌ت كو ده‌ست ژ پشته‌ڤانیا گرۆپێن چه‌كدار به‌رده‌ت و هێزێن خوه ژ ئاخا وێ ڤه‌كێشیت و ل هه‌مبه‌ر دا توركیا ژی داخواز دكه‌ت كو ئه‌و پێكڤه كار بۆ نه‌هێلانا رێڤه‌به‌ریا خوه‌سه‌ر بكه‌ن، خالا دی یا هه‌ری گرنگ ژی بابه‌تێ په‌نابه‌رێن سووریێ یه، چونكی نها بۆ به‌شاری ژی دێ یا باش بیت كو په‌نابه‌ر ل ده‌ڤه‌رێن كوردی بهێنه بجهكرن، چونكی یا ب سالانه سووریێ نه‌شیایی ل دژی كوردان بكه‌ت توركیا دێ بۆ وێ كه‌ت، ژ به‌ر هندێ ژی دبیت د كۆمبوونا هه‌ر سێ سه‌رۆكان دا رێككه‌فتنه‌ك ل دژی كوردان بهێته كرن.
