ئاڤاكرنا جڤاكه‌كێ دوور ژ هزرێت عه‌شیره‌تگه‌ریێ و توندوتیژیێ
ئێك ژوان پرسێن گرنك كو ل ده‌ڤ گه‌له‌كان ژ مه دووباره دبیت و هه ر ئێك ژمه ل دووڤ هزرا خوه روَنكرن و شڵوڤه كرنان بوَ دده‌ت كو كوردان ب درێژیا مێژوویا خوه دژایه‌تیا خوه بخوه كریه و ئه‌ڤێ پرسێ ژی كارتێكرنێت خراب ل دوویڤ خوه هێلاینه؛ دیسان ژ پرسێن ئاڵوَزی و تێكدان دمێشكێ گه‌له‌ك خه‌لكی و ب تایبه‌تی ژ سنێله و قوتابیان دا هێلای ئه‌و رێكا شه‌هید (هوجام سوَرچی ) پێ هاتیه كوشتن بوویه نه‌خاسمه د ناڤ خه‌لكێ ئاكرێ دا وه‌كو ئه‌م دزانین لایه‌ن و پێكڤه ژیانا خه‌لكێ ئاكرێ یا ب هزر و بیر و باوه‌رێن عه‌شیره‌تگه‌ریێ ڤه گرێدایه ئه‌و ژی پێك هاتینه ژكوَمه‌كا هزر و بیرو باوه‌ران و ره‌وشت و تیتالان كو ژ باب و باپیرێن وان بوو ماینه وه‌كی زنجیره‌كا پێكڤه گریداینه، دكارین بێژین ژلایه‌كی ڤه باشیێن خوه هه‌نه لێ ژ لایه‌كێ دیترڤه خرابی ژی دناڤا ڤان ره‌وشت و تیتالان دا هه‌نه و پێدڤی ب روَنكرن و دووڤچوونان بوَ هنده‌ك تشتان بهێنه كرن تاكو ئه‌ڤ پرسه مه‌زن نه‌بن و نه‌بنه جهێ په‌یدا بوونا ئاریشه‌یان د ناڤ چڤاكی دا؛ ئه‌گه‌ر ئه‌م بێژین قوتابخانه تنێ جهێ هندێ یه كو ئه‌م خوه گرێده‌ین ب وی پروگرامی ڤه، ئه‌وێ بوَ مه هاتیه ده‌ست نیشانكرن وی ده‌می ئه‌م شاشین، لڤێره شاشی هه‌ر ژ رێڤه‌به‌رێن په‌روه‌ردێ هه‌تا رێڤه‌به‌رێن قوتابخانان و هه‌تا دگه‌هیته ماموَستایان؛ چونكو تنێ هزرا مه لسه‌ر وی سیسته‌مێ په‌روه‌ردێ یه یێل به‌ر ده‌ستێ مه لایه‌نێ هشیاركرن و به‌رفرهه‌كرنا هزرا قوتابیانه ژ گه‌له‌ك لایان ڤه هاتیه پشت گوه هاڤێتن؛ ب مخابنی ڤه وی ماوێ خاندن ده‌ست پێدكه‌ت هه‌تا ساڵ بدوماهی دهێت، لایه‌نه‌ك خوه به‌رپرسیار نابینیت سمیناره‌كێ ل دوور ڤێ ره‌وشا ئاڵوَزا ئه‌ڤی بارودوَخێ نه‌خوه‌ش یێ نوكه ملله‌ت تێدا ده‌رباز دبیت بوَ ڤی قوتابی یان ڤی سنێله‌ی روَنبكه‌ین و بزانین چه‌ند پرس د هزرا وان دانه دبێ به‌رسڤن! ئه‌و بخوه ل دوور هزر و بیرێن خوه و وی دورهێلێ تێدا دژین شڵوڤه دكه‌ن و ژوان پرسَین كو گه‌له‌ك سنێله دكه‌ن و دووباره دكه‌ن؛ ئه‌رێ بوَچی ئه‌ڤ دووژمنێ بناڤێ داعش هژماره‌كا زوَر ژ كوردان گه‌هشتینه د ناڤ رێزین وان دا و دوژمناتیا خوه بخوه دكه‌ن؟ ئه‌رێ بوَچی كوردان ب درێژیا مێژوویا خوه هه‌ر ژ سه‌رده‌مێن مێرنشینان هه تا دگه‌هیته ڤی سه‌رده‌می دووژمنایه‌تیا ملله‌تێ خوه كریه؟ ئه‌رێ بوَچی شه‌هید (هوَجام سوَرچی) ب ده‌ستێ كه‌سه‌كی هاته سه‌ربڕین كو د ده‌مه‌كی دا ئه‌ڤ هه‌ردوو كه‌سه خه‌لكێن ئێك ده‌ڤه‌رێنه؟ ئه‌ڤ پرسه و گه‌له‌كێن دیتر هزرا ڤان سنێله‌یان ئاڵۆز كرینه كو وه‌ك ئه‌م دزانین هزرا ڤان سنێله‌یان و قوَناغا ژیێ وان قوَناغه‌كا هه‌ستیاره هزرێن وان دساده نه و جیاوازن و دبه‌رهه‌ڤن بوَ گوهۆرینێ و گه‌له‌ك جاران ئه‌ڤ پرسه و هزره بووینه جهێ گه‌نگه‌شێ و په‌یدابوونا شه‌ران د ناڤبه‌را قوتابیان ب خوه دا ئه‌گه‌ر مه بڤێت جڤاكه‌كێ پێشكه‌ڤتی و بێ ئاریشه په‌یدا بكه‌ین دڤێت چاڤدانا مه ل سه‌ر سنێله‌یێ مه بیت و به رفره‌هكرنا هزرا وان بیت تایبه‌ت قوتابخانه و قوتابێن ده‌ڤه‌را ئاكرێ؛ چونكو براستی ژی ده‌ڤه‌ره‌كه هزر و بیرێن عه‌شیره‌تگه‌ریێ ل سه‌ر دزاڵن، هه‌بوونا ڤان پرسان نیشانن بوَ هه‌بوون و په یدابوونا ئاریشه‌یان؛ نه بتنێ د ناڤ قوتابخانان دا ئه‌ڤ ئاریشه هه‌نه به‌لكو ژ ده‌رڤه‌ی سنوورێ قوتابخانان دا ژی ئه‌ڤ هزره دبه‌ر به‌ڵاڤن له‌وما ژ كارێن هه‌ره پێدڤی بوَ ڤێ ده‌ڤه‌رێ بهێته‌كرن سازدانا سمینارانه و روَنكرنا ڤان هزر و بیرانه و به‌رسڤدانا ڤان جوَره پرسانه؛ ئه‌ڤجا هه‌ر لایه‌نه‌ك خوه به‌رپرس و خه مخوَرێ ڤێ ده‌ڤه‌رێ بدانیت، بلا خوه ل ڤان پرسه ئاریشه‌یان بكه‌نه خوَدان، چونكو ژ پێكهاته‌ێن هه‌ره گرنگێن جڤاكا مه ئه‌ڤ سنێله یه ئه‌ڤجا بلا ئاڤاكرنا جڤاكه‌كێ دوور ژ هزرێت عه‌شیره‌تگه‌ریێ و توندوتیژیێ ژ هه‌ول و بزاڤێن مه هه میان بن.