ئاڤاكرنا نەخۆشخانەیا دینارتە گڤاشتن ل سەر نەخۆشخانەیێن ئاكرێ كێمكریە
رەمەزان زەكەریا:
حكومەتا هەرێما كوردستانێ گرنگی ب كەرتێ ساخلەمیێ دایە و نەخۆشخانەكا جۆرێ A ل ناوچەداریا دینارتە دروستكریە.
نەعمان سەلیم خان، سەرۆكێ باژێرڤانیا دینارتە بۆ ئەڤرۆ گۆت: «سوپاسیا حكومەتا هەرێما كوردستانێ دكەین، ب تایبەت كابینەیا نەهێ، ژ بەركو گرنگی ب كەرتێ ساخلەمیێ دایە، ئەم گەلەك دلخۆشین، كو ب گوژمێ ملیارەك و 28 ملیۆن دیناران نەخۆشخانەكا جۆرێ A و هۆلەكا زارۆكبوونێ ل سەنتەرێ ناوچەداریا دینارتە دروستكری».
ناڤبری گۆتژی: «ل دینارتە نەخۆشخانەك هەبوو، د ئاستێ پێدڤی دا نەبوو، ژ بەركو خەلكەكێ مەزن ل دینارتە و دەڤەرا نەهلە هەیە، گڤاشتنەكا مەزن ل سەر نەخۆشخانا ئاكرێ چێكربوو، بەلێ پشتی ئەڤ نەخۆشخانە هاتیە چێكرن، شیا ئەو گڤاشتنا ل سەر نەخۆشخانێن ئاكرێ هەمیێ راكەت و خەلكەكێ مەزن ژی دێ مفای ژێ وەرگریت».
