ئاڤان راهێنه‌را ئێكانه كچه هه‌لبژارتیێ ئیراقێ وه‌رگرتی
ئه‌ڤرۆ،
پشتی ب سه‌ركه‌فتیانه كچه‌كا پارێزگه‌ها دهۆكێ شیایی ل گه‌ل دو یاریزانێن خوه پشكداری قاره‌مانیا رۆژئاڤا ئاسیا یا یاریا تێنسا ئه‌ردی بكه‌ن ئه‌وا ل حه‌فتیا بوری وه‌لاتێ لوبنان مێڤانداریا وێ كری، ئاڤان محه‌مه‌د سالح دهێته هژمارتن راهێنه‌را ئێكانه یا كچ ل سه‌ر ئاستێ ئیراقێ و كوردستانێ هه‌لبژارتیێ ئیراقێ وه‌ربگریت.
لدور ڤێ یه‌كێ و د داخویانیه‌كێدا ئاڤده‌ل حه‌سه‌ن راهێنه‌رێ یانا هۆك یا وره‌زشی دیاركر یاریزانا وان یا به‌رێ و راهێنه‌را نوكه یا خودان شیان ئاڤان محه‌مه‌د سالح وه‌كو راهێنه‌را سه‌ر ئاستێ كچان بۆ هه‌لبژارتیێ ئیراقێ هاتیه ده‌ستنیشانكرن و دهێته هژمارتن سه‌ر ئاستێ ئیراقێ راهێنه‌را كچ یا ئێكانه ڤی پۆستی وه‌ردگریت ئه‌ڤچه‌نده ژی جهێ شانازیێ یه كو كچه‌كا پارێزگه‌ها دهۆكێ بگه‌هیته ئاستێ بلند و ئێكه‌م پێگاڤا وێ یا سه‌ركه‌فتیانه د قاره‌مانیا رۆژئاڤا ئاسیا دا بوو پشتی كو ل گه‌ل دو یاریزانێن خوه یێن دژیێ كێمتر 12 سالی دا پشكداریه‌كا سه‌ركه‌فتی كرین.
هه‌روه‌سا ناڤهاتی دیاركر یاریزانێن یانا دهۆك سه‌ر ئاستێ كچان ئێكه‌م بێ ڕكابه‌رن بۆ ناڤ رێزێن هه‌لبژارتیێ ئیراقێ دا هه‌ر ژ سالا 2009 هه‌تا نوكه رێژا 80% هه‌لبژارتیێ ئیراقێ پشتبه‌ستن ل سه‌ر یاریزانێن پارێزگه‌ها دهۆكێ كرینه و سه‌رجه‌مێ 21 یاریزانا بۆ ژیێن جودا چووینه دناڤ رێزێن هه‌لبژارتیێ ئیراقێ بۆ قاره‌مانیێن عه‌ره‌بی و نێڤده‌وله‌تی دا و گۆت: ئه‌ڤچه‌نده ژی بۆ به‌رده‌وامیا دووڤچوون و پشته‌ڤانیا ئێكه‌تیا تێنسا ئه‌ردی ب سه‌رۆكاتیا سه‌عید خه‌لیل و زه‌حمه‌تا ئه‌م رۆژانه ب راهێنانا دبه‌ین كو بشێن هه‌رده‌م پارێزگه‌ها دهۆكێ بۆ یاریا تێنسا ئه‌ردی ئێكه‌م بیت بێ ڕكابه‌ر، له‌ورا هیڤییا مه ئه‌وه پشته‌ڤانیا ڤێ وه‌رزشێ بهێته كرن.
