ئاڤاهیێ كۆلیژا نۆشداری ل زانكۆیا زاخۆ هاتە ڤەكرن
زاخۆ، دلۆڤان و عەلی:
ب ئامادەبوونا گۆهدار شێخۆ، سەرپەرشتێ ئیدارەیا سەربخوە یا زاخۆ و دكتۆر نازم سلێمان سەرۆكێ زانكۆیا زاخۆ، دوهی 23/10/2023 ئاڤاهیێ كۆلیژا نۆشداری ل زانكۆیا زاخۆ هاتە ڤەكرن، كو ب گوژمێ 977 ملیۆن دیناران ل سەر بودجەیا حوكمەتا هەرێما كوردستانێ هاتیە دروستكرن.
گۆهدار شێخۆ د كۆنگرەكێ ڕۆژنامەڤانی دا دیار كر، ل گەل دەستپێكرنا سالا نوو یا خواندنێ پشتی ب دوماهی هاتنا ئاڤاهیێ كۆلیژا نۆشداری، كەڤتە د خزمەتا قوتابیێن زانكۆیا زاخۆ دا و كۆلیژا نۆشداری ب گشتی ب ڕێكوپێكی و جوانترین سیستەم هاتیە ئاڤاكرن، ئەڤ كۆلیژە پێك هاتیە ژ شەش هۆلێن ب باشترین سیستەمێن پێشكەفتی هاتینە دانان.
گوت: «ل سەر ڕاسپاردێن مەسرور بارزانی، سەرۆكێ حوكمەتا هەرێما كوردستانێ، سۆزا بەردەوامیا پێشكێشكرنا خزمەتگوزاریان ل سنوورێ ئیدارەیا سەربخوە یا زاخۆ د بەردەوامن».
شێخۆی ل دوماهیێ داخوازا سەركەفتنێ ژ بۆ هەموو قوتابیان خواست و دیار كر كو كاروانێ ئاڤەدانیێ ل هەموو سنوورێ ئیدارەیا سەربخوە یا زاخۆ د بەردەوامن.
دكتۆر نەوفەل حسێن، ڕاگرێ كۆلیژا نۆشداری ل زانكۆیا زاخۆ گۆت: «ئەڤ ئاڤاهیە ل سەر شێوازەكێ مودرن هاتیە ئاڤا كرن، كو ژ شەش هولێن مەزن یێن سەردەم پێك دهێت، ب ڤەكرنا ڤی ئاڤاهی ژی ئەم دێ ژ ئاریشەیا نەبوونا ئاڤاهیەكێ تایبەت رزگار بین، ژ بەركو بەری نوكە مە ل ئاڤاهیێ نەخوشخانا زاخۆ یا گشتی دەوم دكر».
