ئاڤا بن ئه‌رد سه‌دێ 60 ل كێمیێ دایه!
هه‌ولێر، سولین سلێمان
رێڤه‌به‌رێن گشتیێ سه‌رچاڤێن ئاڤێ ل وه‌زاره‌تا چاندنا حۆكمه‌تا هه‌رێما كوردستانێ راگه‌هاند، ژ ئه‌گه‌رێ كێم بارینا بارانێ ئاڤا ژێر ئه‌رد به‌رده‌وام د كێمبونێدایه، دیسا ژی مه گه‌له‌ك ئاڤا ژێر ئه‌رد ئینایه ده‌ر و كارپێكریه، چونكی ژ بۆ مه‌ره‌ما گه‌له‌ك كاران مه پێدڤی ب لێدانا بیرا هه‌بوویه ل هه‌رێما كوردستان.
كاروان سه‌باح ئه‌و ژی گۆت: مه پلانێن باش هه‌نه ژ بۆ كێم كارئینانا ئاڤا ژێر ئه‌رد، چونكی ئێك ژ ئه‌گه‌رێن سه‌ره‌كیێن كێمبونا ئاڤا ژێر ئه‌رد زۆر كارئینانا ڤێ ئاڤێیه وه‌كی دبینین، د نۆكه‌دا ئاستێ ئاڤا ژێر ئه‌رد ل هه‌رێما كوردستانێ كێم بوویه، ب تایبه‌تی ژی ل ده‌وروبه‌رێن پارێزگاها هه‌ولێرێ، هه‌ر بۆ نموونه ئێك ژ بیرێن مه‌لا ئومه‌ر نزیكی 100 میترا كێم كریه كو ئه‌ڤه تشته‌كێ باش نینه، دیسا ژی د هنده‌ك ناوچێن ئاڤینه ژی ئاستێ ئاڤێ كێم بووینه، وه‌كی هه‌وره‌مان و شاره‌زور و گه‌له‌ك جهێن دی، ئانكو كێمبونا ئاڤێ هه‌می هه‌رێما كوردستانێ ڤه‌گرتیه، ئه‌ڤ چه‌نده ژی یاب مه‌ترسیه و پێدڤیه ب زووترین ده‌م بهێته چاره‌سه‌ر كرن.
ژ لایه‌كێ دووڤه گۆت: ئه‌ڤ كێم ئاڤیه نه‌بوویه ئه‌گه‌ر مه‌ترسی ل سه‌ر چاندنا هه‌رێما كوردستانێ هه‌بیت، چونكو د هنده‌ك ناوچه‌یان گوهۆرینا سه‌قای هه‌یه، چونكی هنده‌ك ناوچه هه‌نه ئاڤه‌كا زۆر تێدا دهێته هه‌ده‌ردان، له‌وما ئه‌م ل وان جها گه‌نم چاندنێ ب دووماهی دئینین ل جهێ وێ ئه‌م جه‌هی دچینین كو پێدڤی ب 200 هه‌تا 259 ملم.
دیاركر ژی، مه پێدڤی ب ده‌ریاچه‌یه‌كێ هه‌یه كو جهێ وێ یێ ستراتیژی بیت، چونكی وه‌كی دبینین گوهرینێن سه‌قای رویدده‌ن، هه‌روه‌سا مه پێتڤی ب هندێ هه‌یه به‌رهه‌مێن خوه ڤرێكه‌ینه ژ ده‌رڤه. ئاماژه ب وێ یه‌كێ ژی دا و گۆت: جهێ داخێیه نیڤیا گوندێن كوردستانێ مه‌ترسیا كێم ئاڤیێ ل سه‌ر هه‌یه، ل سه‌ر ڤێ چه‌ندێ دڤێت ئه‌م زۆر دهشیار بین، چونكو ئه‌گه‌ر هزر ل دروستكرنا به‌نداڤا بهێته كرن، دێ بیته بابه‌ته‌كێ سیاسی كو د ده‌مه‌كی دا ب تنێ بۆ مه‌ره‌ما كێمبوونا مه‌ترسیا ئاڤێیه، مه ژ بو ڤێ چه‌ندی دێ پێدڤی ب پشته‌ڤانیا كومه‌لگه‌هێ و میدیایێ هه‌بیت ژ بۆ چاره‌سه‌ركرنا ڤی دوخی.
هه‌ر چه‌نده حۆكمه‌تا هه‌رێما كوردستانێ گه‌له‌ك پلانێن ستراتیژی هه‌نه ژ بۆ ڤێ چه‌ندێ كو بریاره ده‌ست ب چێكرنا 7 به‌نداڤان بهێته كرن، ئه‌ڤ چه‌نده مه‌ترسیێن سه‌ر ئاڤێ دێ كێم كه‌ت و وان ئاریشا دێ چاره‌سه‌ر كه‌ت، چونكی وه‌لاتیێن مه مافێ وانایه ئاڤا پێدڤی به‌رده‌ست هه‌بیت، هه‌ر چه‌نده چێكرنا وان به‌نداڤان كوژمه‌كا زۆر پێدڤیه جهه‌كێ زۆر ژی دێ داگیر كه‌ت، لێ مه پێدڤی ب چێكرنا وان هه‌یه، كاروان ئه‌و ژی ئاشكرا كر كو نه ب تنێ هه‌رێما كوردستانێ تووشی كێم ئاڤیێ بوویه، به‌لكو هه‌می جیهان د نۆكه دا گوهۆرینا سه‌قای رویدده‌ت، ئاڤ ل ته‌ڤایا جیهانێ كێم دبیت.
ئه‌و یه‌ك ژی نه ڤه‌شارت، ل سه‌ر هه‌ر وه‌لاتیه‌كی پێدڤی یه هند ئاڤێ ب هه‌ده‌ر نه‌ده‌ت، ب تنێ پێدڤی نه‌بیت، چونكو ل دویڤ وان ڤه‌كۆلینێن مه كرین ئاڤا سه‌ر ئه‌رد ژ سه‌دا 60 كێم كریه، باران به‌ره‌ف كێم بوونێ دچیت و به‌فربارین ژی ژ ناڤ دچیت، چونكی ژ بۆ دروستبوونا هه‌ر لافاوه‌كێ هشكبوونه‌كا مه‌ترسی دروست دبیت، دیسا ژی هنده‌ك پسپورێن بیانی دگه‌ل مه كار دكه‌ن دا كو بشێین دووباره ئاڤا ژێر ئه‌رد پتر لێ بكه‌ین.
