ئاڤا ڤێ بیرێ بۆ چارەسەریێ یە
رەمەزان زەكەریا
ل گوندێ (كولەكا) ل سنۆرێ ناوچەداریا بجیل، ل نێزیك ئاكرێ بیرەكا ئیرتیوازی هەیە كو ب گۆتنا خەلكێ دەڤەرێ ئاڤا وێ بۆ بەرێ گولچیسكا مفایەكێ مەزن هەیە، ژبەركو هەر كەسێ بەر هەبیت و وێ ئاڤێ ڤەخۆت پشتی دەمەكێ كێم دێ بەری هاڤێژیت.
لوقمان سۆرچی، كو سەرپەرشتیا وێ بیرا ئاڤێ بۆ ئەڤرۆ گۆت: رۆژانە ژ هەموو دەڤەرێن كوردستانێ خەلك دهێن و ئامانێن خۆ پڕی ئاڤ دكەن و ئەوێ بەرك هەبیت ب ڤەخوارنا ڤێ ئاڤێ بەركێ وی دكەڤیت، بۆ زانین ئەڤ بیرە ل سالا (2017) ژلایێ خێرخوازەكێ ڤە ل هاتیە كولان كو كووراتیا وێ (200) مەترن و ل دەستپێكێ خەلكی دگۆت ئاڤا وێ یا گرانە و تامەكا تەحل ژێ دهێت، بەلێ پشتی پشكنینێن تاقیگەهێ دیار بوو كو ئێكە ژ پاقژترین جۆرێن ئاڤێ و چەندین كۆمپانیا حەزدكرن كارگەهەكا ئاڤێ ل گوندی دانن، بەلێ خەلكێ گوندی ڕێ نەدانێ و هەردەم دبێژن (ئاڤ بتنێ بۆ خێرێ یە و بۆ فرۆتنێ نینە).
