ئاڤا ڤەخوارنێ ئاریشەیەكا سەرەكی یە ل شنگالێ
دهۆك، لەزگین جوقی
قایمقامێ قەزا شنگالێ راگەهاند، ئاریشا سەرەكی ل شنگالێ ئاڤە كۆ پتریا بیرێن ئاڤێ هشكبووینە و هشكەساڵی كارتێكرن ل سەر ئاڤێ كریە.
نایف سەیدۆ، قایمقامێ قەزا شنگالێ راگەهاند، نوكە ئاریشا سەرەكی ل قەزا شنگالێ ئاڤا ڤەخوارنێ یە كۆ هشكەساڵی بوویە ئەگەر گەلەك بیرێن ئاڤێ هشك بن و ئاڤ كێم بیت، ل دووڤ بەرسڤا رێڤەبەرێ ئاڤێ و ئاڤا ژێر عەرد دایە مە، ئەو ل هیڤینێە هەتا 50 بیرێن ئاڤێ ل شنگالێ بهێنە كۆڵان و ئەڤ بیرێن ئاڤێ ل شنگال و ناحیا سنوونێ دێ هێنە كۆڵان و ل شوونا وان بیرێن ئاڤێ هشكبووینە.
گۆت ژی: ئاریشا ئاڤا ڤەخوارنێ ل شنگالێ چارەسەر نابیت هەتا پرۆژەكێ مەزن یێ ئاڤا ڤەخوارنێ نەهێتە چێكرن، گەلەك جاران هەوڵدان یێن هاتینە كرن بۆ چێكرنا پرۆژەكێ ستراتیژیێ ئاڤا ڤەخوارنێ و ئەم بەردەوام داخوازا چێكرنا پرۆژەكێ مەزن یێ ئاڤا ڤەخوارنێ بۆ شنگالێ دكەین دا كۆ ئاریشا ئاڤا ڤەخوارنێ چارەسەر بیت.
قایمقامێ قەزا شنگالێ دیار كر، هشكەسالیێ گەلەك زیانەكا مەزن یا گەهاندیە ژێدەرێن ئاڤێ ب دیتنا من كۆلانا بیرێن ئاڤێ بۆ خەلكێ نە چارەسەرییە، ژبەركۆ هشكەسالی كارتێكرنێ ل سەر بیرێن ئاڤا ڤەخوارنێ دكەت ئەگەر چەند بیرێن ئاڤێ بهێنە چێكرن د بەرامبەر دا هندەك هشك دبن، لەورا چێكرنا پرۆژەكێ مەزن یێ ئاڤا ڤەخوارنێ بۆ شنگالێ گەلەك گرنگە.
قایمقامێ قەزا شنگالێ راگەهاند، گوژمێ 50 ملیار دیناران د ناڤ سندوقا ئاڤەدانیا شنگالێدا بوون، كێمتر ژ چوار ملیار دینار بۆ ئاڤادانیا شنگالێ هاتنە تەرخانكرن.
