ئاڤدهل حهسهن: پشكداریا كچێن دهۆكێ بۆ قارهمانیا دێڤێز یا نێڤدهولهتی دهستكهفته
ئهڤرۆ،
ب شێوهكێ فهرمی چار یاریزانێن كچ یێن پارێزگهها دهۆكێ دێ نوونهراتیا ههلبژارتیێ ئیراقێ بۆ ژیێن جودا د قارهمانیا دێڤێز یا نێڤدهولهتی بۆ یاریا تێنسا ئهردی دا كهن ئهوا چاڤهڕێ یه ههڤڕكیێن وێ ل ناڤهراستا شوباتا سالا 2022 وهلاتێ سریلانكا مێڤانداریا وێ بكهت.
ئاڤدهل حهسهن راهێنهرێ تیما تێنسا ئهردی یا یانا دهۆكێ بۆ رۆژناما ئهڤرۆ گوت: ههر چار كچێن پارێزگههێ زهلال سهعید و لارا ئاڤدهل بۆ ژیێ 16 سالی و هانا ئاڤدهل و ڤینۆس گۆهدار بۆ ژیێ 14 سالی شیاین رێزێن پێشیێ بهێن د قارهمانیا ئیراقێ دا ئهوا دوهی ل یاریگههێن یانا دهۆك ب پشكداریا 15 یاریزانێن بژارده ل سهر ئاستێ ئیراقێ هاتیه كرن ژبۆ دهستنیشانكرنا پێكهاتیێ ئیراقێ خوه بهرههڤكرن بۆ قارهمانیا دێڤێز یا نێڤدهولهتی ئهوا دێ ل وهلاتێ سریلانكا هێته ئهنجامدان، ئهڤچهنده ژی بوویه جهێ دلخووشیا خێزانا وهرزشی یا یاریا تێنسا ئهردی كو كچێن پارێزگههێ ب ئاست و هونهر و ئهنجام شیاین بگههنه ئارمانجا خوه سهرباری ههبوونا ههڤڕكیهكا بهێز تایبهت ل گهل كچێن پارێزگههێن بهغدا، دیالا و حلله.
ژلایهكێ دووڤه ناڤهاتی ئهوچهنده ژی دیاركر كو بۆ پێنگاڤا داهاتی و باشترین بهرههڤی بۆ قارهمانیا دێڤێز دێ پلانهكا رێكخستی و تایبهت ههبیت ژوانا دانانا كهمپێن راهێنانێ كو ل گهل من دا دێ راهێنهر عهلا زهكی ههڤكار بیت پێكڤه بۆ پێشخستنا ئاست و شیانێن یاریزانان كهین و گوت: پشكداریا چار كچێن پارێزگههێ د قارهمانیهكا نێڤدهولهتی یا مهزن دا ئهو بخوه دهستكهفته چنكو ب سانههی نهبوویه ههتا بگههنه ڤێ قۆناغێ لێ دێ ههموو بزاڤا كهین ئهنجامێن دلخۆشكهر ههبن و نوونهراتیهكا سهرفهرازبیت.