ئاڤده‌ل حه‌سه‌ن: پشكداری د قاره‌مانیا نێڤده‌وله‌تی دا یا سه‌ركه‌فتی بوو
ئه‌ڤرۆ،
راهێنه‌رێ تیما تێنسا ئه‌ردی یا یانا دهۆكێ و هه‌لبژارتیێ ئیراقێ دیاركر كو سه‌رباری ژ ده‌ستدانا ناسناڤ و ئه‌نجامێن لاواز یێن كچا پارێزگه‌هێ هانا ئاڤده‌ل د قاره‌مانیا ئاسیا دا ئه‌وا ل وه‌لاتێ ئوردن بۆ ماوێ پێنچ روژان دهاته كرن لێ یا سه‌ركه‌فتی بوو.
زێده‌تر ئاڤده‌ل حه‌سه‌ن بۆ رۆژناما ئه‌ڤرۆ گوت: هه‌رچه‌نده كچا پارێزگه‌هێ و هه‌لبژارتیا ئیراقێ یا كێمتر 12 سالی شیایه سه‌ر ئاستێ ئیراقێ ئێكه‌م بیت بیێ ركابه‌ر و چه‌ند قاره‌مانیێن نێڤده‌وله‌تی ل وه‌لاتێن توركیا و عه‌ره‌بی بۆ ژیێن هه‌شت و ده‌ه سالی ئه‌نجامێن دلخووشكه‌ر و پێشیێ ب ده‌ستڤه‌ئیناینه، لێ مخابن دڤان سالێن دووماهیێ دا ژبه‌ر قه‌یرانا دارایی و نه پووته‌دانێ یاریزانێن مه ژ كه‌مپێن راهێنانێ و لێكنیزكبوون ل گه‌ل یاریزانێن دی یێن ده‌رڤه بێی به‌هربووینه ئه‌ڤچه‌نده ژ كارتیكرن ل سه‌ر ئاستێ وان كریه و ئه‌نجامێن لاواز د قاره‌مانیا ئاسیا هه‌بوو ئه‌وا دوهی ل ئوردنێ بدووماهی هاتی،
هه‌روه‌سان ناڤهاتی گوت: هانا شیا ژ چار یاریێن خوه ل گه‌ل یاریزانێن هه‌لبژارتیێن ئیرانێ، لوبنانێ، سوریا و ئوردن سه‌ركه‌فتنه‌كێ تۆماربكه‌ت و كێمتریا چه‌ند خاله‌كان خوساره‌ت بیت لێ وه‌كو ئاستێ هونه‌ری و شیانی هانا باشترین یاریزان بوو بتنێ دووركه‌فتنا وێ د كه‌مپێن راهێنانێ دا شارزاهیا وێ كێمكربوو، هه‌رچه‌وابیت یاریزانا پارێزگه‌هێ شیا مفایی ژێ وه‌ربگریت ب لێكنێزكبوون گه‌ل یاریزانێن دی یێن عه‌ره‌بی وڤه‌گه‌ریان بۆ هه‌ڤڕكیان، له‌ورا هیڤییا مه ئه‌وه پشته‌ڤانیا ڤێ یاریزانێ بهێته‌كرن ژبه‌ركو پاشه‌رۆژه‌كا ب ده‌ستكه‌فتان ل گه‌ل هه‌یه.
