ئاڤریێن خاپینۆك
نایف مەحموود
ژ مێژەیە..
ئەز د لاندكا عەشقا تەدا كەهی بوویم
تو ژی ژ شیمانیا حەزێن خوە یێن عاقدی
هلباسكی پەیسكا ئەڤینا من دبی
ل دەستپێكا ئاخلێەڤەیا ئاڤریێن خاپینۆك
من و تە دەستكێن گولان
قافكێن هەلال و نێرگزان
ژ لات و زناران
دگەل بەژنا بوهارێ ب ڕێیا خوە دئینان
ل بن دارەكێ… ئو
وارەكێ هەمی بوهارا خوە ژ بو ئەڤینا من و تە ڕائێخستی
زڤستانەكا ئەور و بارانێن خوە
ل هنداڤی من تە ڕاپێچاین و
بەفرا خوە ل سەر مە ڕاكری،
دەرگەهێ مژ و مۆرانێن خوە ل سەر مە
دائێخستی
سیبەرەك ژ بەلگێن دارا بوهارێ
بابەلیسكەك ژ باوەشا مەها ئادارێ
دبیتە بالگەهێ خەون و خوزیێن ئەڤێ ئەشقا تەڕ و گەرم!
ئەڤان حەزێن هار و ب شەرم!
نە تو دكاری تهێنكا خوە ژ دووراتیا وێ كانیا هە
ب ماچەكا لێڤێن من تەڕ بكەی
نە ئەز دكارم باوەشا گەردەنا تە بكەم..،
دیراتیەك ژمن و تە نێزیكتر هەیە
خویسارەكێ لێڤێن تە گرتینە و
چاڤێن تە تژی بارینا ڕوندكانە
ئەز ژی د لەپێن ڤی بەختی دا
دیلەكێ بێ سەمیانم
ل سەر پێلێن بای..
ل بەر باڕۆڤا زفستانا بەفرا چیای
گەریدەیەكێ دەربەدەر و شێت و دینم..
چەند جارەكا ل نیگارێ پرچا تە دنێرم
پەیڤ و هەلبەستان
ژ داڤێن مژیلانكێن چاڤێن تە دڤەهینم
بێی تە ڕێڤنگەكێ پەریشانم
جان و گیان، هەناسە و هیڤی و ژیان
سەودا سەر و دلبرینم.
