ئاڤریەكێ ل هێڤە ژی ڤەدە
رۆژین یاسین بامەرنی
چ سەما بێدەنگیێ یە دناڤ پرچا تەدا و
بێژە من، هزران تو كیڤە بری؟
چاڤێن تە ڕك و ڕك تەماشایی چی دكەن
چ نامە ڤێییە!
بێژە من، ئەو چ رۆناهیا بریسقەدارە دناڤ دێمێ تە دا بوو ،
ژ دیتنا ئێكەم ئەز راكێشام
جوانیا تە مرۆڤ كوژە و پەیڤ كوژە و شعر كوژە و
ئها ئەز یێ خوە د چاڤێن تەدا وێنەدكەم
ئاڤریەكێ ل هێڤە ژی ڤەدە و
دا خوە دناڤ بیبیكا چاڤێن تەدا ببینم
تو چەندا دیری و چەندا ژ پەیڤێن من نزیك
ل هەر بلنداهیەكێ
چیرۆكەك دناڤ خەونێن تەدا د بوهژیت و
دناڤ هەر چیرۆكەكێ ژیدا
بیرهاتنەك تە دناڤ خوە دا بەرزە دكەت و
تو یا ل پەیڤان دگەری بكەیە شعرەك
وێ شعرێ د قەدەرێ وەربكەی
ئەزێ ژ پەیڤان باركریمە و بهێلە ل بەر وێنەیێ تە
ڤێ شعرێ د وێ قەدەرێ وەركەم
یا هزرێن تە دویر برین!
