ئاڤڕێژەكێ زیان گەهاندیە خودانێن هژمارەكا چەمان
سندس سالح سلێڤانەیی:
هژمارەكا خۆدانێن وان چەمێن دكەڤنە تاخێ شندۆخا گازندەیان ژ هەبوونا قەسیسەیەكا ئاڤێ دكەن كو دكەڤیتە وی تاخی و دبێژن دەمێ باران دهێت ئاڤ ڕادبیت و د سەر وێ قەسیسێ ڕا دچیت و زیانێ دگەهینتە دەرامەتێ مە و رێڤەبەرێ ئاڤ و سۆلینان ژی دبێژیت: مە ژی پێ باشە ئەو قەسیس بهێتە گرتن، لێ خودانێن وان هەموو چەمان د ڕازی نینن.
سەفەر، خودانێ چەمەكێ ژوانە دبێژیت: دەمێ ئاڤ د سەر قەسیسێ ڕا دهێت ئێكسەر دهێتە دناڤ چەمێ مە و ئەو دەرامەتێ مە چاندی بۆمە ناهێلیت و ب ڤێ چەندێ زیان دگەهیتە مە و گەلەك جاران مە گازندەیا خوە گەهاندیە رێڤەبەریا ئاڤ و سۆلینان لێ چو بۆمە نەهاتیە كرن و ئەڤە زڤستانەكا دی هات دیسان دێ هەمان تشت ب سەرێ مە هێت.
عەبدوللا، خودانێ چەمەكێ دی یە ل هەمان تاخی داكوكیكێ ل سەر گۆتنا جیرانێ خوە دكەت و دبێژیت: پتری دەه سالانە ئەڤ قەسیسە زیانێ دگەهینتە بەرهەمێ مە و هەكە بهێتە گرتن دێ زیانێن مە ژی كێمتربن، لێ هەتا نوكە كەسێ خوە ل ئاریشەیا مە نەكریە خودان، لەورا سالانە زیان دگەهیتە مە.
ئەندازیار یونس جانۆ رێڤەبەرێ ئاڤ و سۆلینان دبێژیت: مە ئاگەه ژوێ قەسیسێ هەیە و بەری سێ سالان مە گرتبوو، لێ جارەكا دی ل دووف داخوازا هژمارەكا خۆدانێن وان چەمان هاتە ڤەكرن، چونكو وان دگۆت ئەم مفای ژ وێ ئاڤێ دبینینن و ڤێگاڤێ ژی هەكە هەموو خۆدانێن وان چەمان بهێن داخۆازا گرتنا وێ قەسیسێ بكەن بۆ مە یا ب ساناهی یە و دێ گرین و هەكە ب مە بیت ئەو قەسیسە بهێتە گرتن باشترە.
