ئاڤ ئاڤاهی یە
سەلاح سندی
ئاڤ ژێدەرێ ژیانی یە، ئاڤێ نە رەنگ و نە تامە و نە بێهنە، بابەتێ مەزاختنا ئاڤێ و كێمبوونا وێ ئەم گرنگی یێ پێ نادەن، سەرەرای پێدڤیا مە یا رۆژانە چ تاكە كەس یان خێزان یان چڤاك ب گشتی.
مە یا بهیستی گەلەك جاران دبێژن هەی مالا تە تشتێ زەحف ئاڤە ئەرێ ئەگەر ئاڤ زەحفە بۆچی هندەكا ئاڤا شرین نینە ڤەخۆن، وەك مەزن دبێژن (ئەگەر هەیە شرك و مرك ئەگەر نینە و كول و كەسەر) یا دیارە هەموو سالان وەرزێ هاڤینێ رێژا ئاڤێ كێم دبیت ب تایبەتی سالا وەرزێ زفستانا وێ كێم بەفرو و باران باری وەك ئەڤ سالە بۆ نموونە دەڤەرا زاخۆ یا ل سەر رووبارێ خابیری گەلەك تاخ ژ بەر نەبوونا رێژا ئاڤا پێدڤی وان یا رۆژانە دنالن، سەرەرای ئاڤا ژێر عەرد و ئاڤا سەرعەرد نەشیانە ل وەرزێ هاڤینێ كێشەیا كێمبوونا ئاڤێ چارەسەر بكەن.
وەك پێدڤی مە مفا ژ ئاڤا خابیری و هیزلی وەر نەگرتە بۆ كۆمڤەكرن و كوگەهكرنا ئاڤێ چێكرنا بەنداڤ و سكران، ل وەرزێ هاڤینێ دی وێ ڤالەهیا ئاڤێ پربكەن بۆ ژیانێ بۆ چاندێ بۆ ب خودانكرنا سامانێ ماسی، هەوەسا بۆ كەرتێ گەشتیاری وەك مەزن بێژن (نەزانێ بەرێ خوە بدە جیرانی) بۆ نموونە وەلاتێ توركیا چەندین سكرێن كوگەهكرنا ئاڤێ دروستكرینە هەتا رادەیەكێ گەلەك مەزن كارتێكرنا خوە ل سەر رێژا كێم بوونا ئاڤا عێراقێ كریە، ئەڤ سالە عێراقێ زەنگا مەترسیا نەمانا ئاڤێ لێدا كو نەدوورە عیراق تووشی هشكە سالیێ بیت، گۆتنەكا بەر بەلاڤ یاهەی تورك دبێژن (ئەم دێ بەرمیلەكا ئاڤێ گوهۆڕین بەرامبەر بەرمیلەكا نەفتێ) دبیت ئەڤ گۆتنە سەیر بیت، بەلێ ئەگەر تە گاز هەبیت و تە ئاڤ نەبیت تۆ ڤەخۆی ل وی دەمی تۆ نەچاری دگەل ئاڤێ ب گوهۆڕی، ل ڤەكۆلینەكا سەربازی دا ئاماژە ب هندێ كریە ئەگەرێن مەزن هەنە شەرێ جیهانێ یێ سیێ ل سەر ئاڤێ بهێتەكرن ئەڤجا پێدڤیە هزر ل چارەسەریا كێم بوونا ئاڤێ بكەن بۆ چەرخ و سەد سالێن داهاتی.
