ئاکپارتیێ دڤێت دو باژێرڤانیێن گرنگ ژ دەستێ پارتا کۆماری دەربئێخیت
دەزگەهێن راگەهاندنا تورکیا دیار دکەن، نها د ناڤ ئاکپارتیێ دا گەنگەشەکا مەزن ل سەر چاوانیا دەستنیشانکرنا وان بەربژاران هەیە یێن بۆ هەر دو باژێرڤانیێن ئەنقەرە و ئستەنبۆلێ دهێنە دیار کرن، چونکی ئاکپارتیێ دڤێت ڤێجارێ ڤان هەر دو باژێرڤانیان ژ دەستێ پارتا کۆماری دەربئێخیت.
دەزگەهێن راگەهاندنا تورکیا دیار دکەن، نها بەرهەڤیێن مەزن بۆ هەلبژارتنێن باژێرڤانیان ل تورکیا دهێنە کرن، کو ئەڤ هەلبژارتنە دێ ل ٣١ ئادارا سالا ٢٠١٤ ل تورکیا برێڤە چن، د هەلبژارتنێن بەری نها یێن باژێرڤانیان دا ژ بەر سیاسەتا وان یا ل هەمبەر کوردان ل هەر دو باژێرێن ئستەنبۆل و ئەنقەرە کوردان پشتەڤانی ل بەربژارێن پارتا کۆماری کرن و ژ بەر ڤێ یەکێ ژی ئاکپارتیێ هەر دو باژێرڤانیێن گرنگ ژ دەست دان و نها ئاکپارتیێ دڤێت هەمان شاشیێن چەند سالێن بۆری نەهێنە دوبارەکرن و کار ل سەر ڤێ یەکێ دکەن دا بشێن هەر دو باژێرڤانیان ژ دەستێ پارتا کۆماری دەرخینن.
د ڤێ دەربارێ دا رۆژناما مللیەت د راپۆرتەکێ دا دیار کریە، ژ بۆ ئەردۆغانی هەر دو باژێرڤانیێن ئستەنبۆل و ئەنقەرە گەلەک گرنگن، ب تایبەتی ژی ئستەنبۆل و نها د ناڤ ئاکپارتیێ دا گەنگەشەکا مەزن دهێتە کرن کا دێ چ کەس بۆ باژێرڤانیێن ئستەنبۆل و ئەنقەرە هێنە بەربژارکرن، چونکی دەستنیشانکرنا کەسێن دلسۆز و جهێ باوەریێ دێ شێت کاریگەریەکا مەزن ل دەنگدەران کەت.
ئەو یەک د دەمەکێ دایە کو پشتی کەمال کلچدار ئۆغلۆ نەشیا جارەکا دی ببیتە سەرۆکێ پارتا کۆماری، نها سەرۆکێ نوو یێ پارتا کۆماری دیار دکەت، وان دڤێت د هەلبژارتنێن ڤێجارێ یێن باژێرڤانیان دا رێژەیا دەنگێ پارتا خوە بگەهیننە ٣٥٪ و پێگەهێ خوە وەکو پارتا هەری مەزن یا ئۆپۆزسیۆنێ بهێز بکەن، ژ بۆ ڤێ یەکێ ژی وەکو پارتا کۆماری وان دڤێت د هەلبژارتنێن ڤێجارێ دا باژێرڤانیێن مەزن و گرنگ ژ دەستێ ئاکپارتیێ دەربئێخینن.
ل ئالیێ دی چاڤدێرێن سیاسی یێن کورد ژی دیار دکەن، نابیت ڤێجارێ وەکو هەلبژارتنێن بۆری کورد تنێ ژ بەر دژبەریا ئاکپارتیێ دەنگێ خوە بدەنە بەربژارێن پارتا کۆماری، چونکی ئەو یەک شاشیەکا گەلەک مەزنە و دێ ئەنجامێن خوە یێن خراب بۆ کوردان هەبیت، دڤێت کوردان ژی بەربژارێن خوە هەبن یان ژی پێشوەخت رێککەفتنەکێ ل گەل وێ هێزێ بکەن یا کو دێ پشتەڤانیێ لێ کەن دا پشتی هەلبژارتنان خزمەتا وەلاتیێن کورد بهێتە کرن، چونکی ژ بەر سیاسەتا شاش یا چەندین سالێن بۆری هەردەم زۆلم ل کوردان هاتیە کرن و دڤێت کورد کەسێن هەژی و دلسۆز بۆ هەلبژارتنێن ڤێجارێ بەربژار بکەن دا بشێن خزمەتا خەلکی بکەن، ژ بۆ ڤێ یەکێ ژی دڤێت بەری هەلبژارتنێن پارتی کوردی ل تورکیا بەرەیەکێ ئاڤا بکەن.
