ئاکپارتیێ چو پڕۆژە بۆ چارەسەرکرنا پرسا کوردی نینن
سیاسەتمەدارەکا کورد ل تورکیا دیار دکەت، پرسا کوردی بوویە قوربانیا بەرژەوەندیێن هێزێن سیاسی ل تورکیا، هەتا نها ژی ئاکپارتیێ چو پرۆژە بۆ چارەسەرکرنا پرسا کوردی ل تورکیا نینن و پشتی هەلبژارتنان ژی چو قۆناغەکا نوو ل تورکیا دەستپێ ناکەت.
گولتەن کشاناک سیاسەتمەدارا کورد و بەربژارا پارتا دەم بۆ سەرۆکاتیا باژێرڤانیا ئەنقەرە دیار کر، مخابن ل تورکیا پرسا کوردی بوویە قوربانیا بەرژەوەندیێن هێزێن سیاسی، هەکە نها پارتا کۆماری بەحسێ چارەسەرکرنا پرسا کوردی بکەت هەر زوو بەرپرسێن ئاکپارتیێ دێ بێژن پارتا کۆماری خیانەتێ ل تورکیا دکەت، هەکە ئاکپارتی بەحسێ چارەسەرکرنا پرسا کوردی بکەت ب هەمان رەنگی پارتا کۆماری دێ دژبەریا پرۆژێ ئاکپارتیێ کەت، ئەو یەک ژی نیشا ددەت کو ل تورکیا هەتا نها ژی پرسا کوردی وەکو پرسەکا سەرەکی نەهاتیە دیتن و گۆت: (بابەتێ پرسا کوردی گەلەک ژ بەرژەوەندیێن هێزێن سیاسی مەزنترە، بەرپرسێن تورکیا ژی گەلەک جاران دبێژن پرسا کوردی پرسا سەرەکی یا تورکیا یە، وی دەمی دڤێت د ئاستێ هەری بلند دا و ب پشکداریا هەموو هێزێن سیاسی کار بۆ چارەسەرکرنا پرسا کوردی بهێتە کرن، نها ژ بەر هەلبژارتنان جارەکا دی هندەک هێزێن سیاسی ژ بۆ بدەستڤەئینانا دەنگێن کوردان بەحسێ چارەسەرکرنا پرسا کوردی ل تورکیا دکەن، لێ مخابن وان بخوە ژی چو پرۆژە نینن و تنێ ئاخڤتنن ژ بۆ کۆمکرنا دەنگان).
ناڤهاتیێ ئەو یەک ژی دیار کر، ل تورکیا هەر دەمێ هەلبژارتن نێزیک ببن هێزێن سیاسی بەحسێ مافێن کوردان دکەن، لێ پشتی هەلبژارتنان جارەکا دی ب توندی دژبەریا مافێن رەوا یێن گەلێ کورد کەن، ژ بەر ڤێ یەکێ ژی ئێدی باوەریا گەلێ کورد ب سیاسەتا پارتێن سیاسی یێن تورک نەمایە و گۆت: (هەتا نها ئاکپارتیێ چو پرۆژە بۆ چارەسەرکرنا پرسا کوردی بەرهەڤ نەکرینە، ل هندەک دەزگەهێن راگەهاندنێ ڤان رۆژان جارەکا دی بەحسێ ڤێ یەکێ دهێتە کرن کو پشتی هەلبژارتنان ئاکپارتی دێ دەست ب قۆناغەکا نوو یا ئاشتیێ و چارەسەرکرنا پرسا کوردی کەت، لێ د راستی دا هەتا نها ژی ئاکپارتیێ چو بەرنامە نینن و تشتێن نها دهێنە گۆتن تنێ ژ بۆ کۆمکرنا دەنگێن کوردانە).
سیاسەتمەدارا کورد ئەو یەک ژی دیار کر، نها پتر ژ هەر دەمەکێ پێدڤیا تورکیا ب ئاشتیێ و ئارامیێ هەیە، هەموو کەس ژی باش دزانیت ژ بۆ ئاشتیێ و ئارامیێ ژی دڤێت بەری هەر تشتەکێ پرسا کوردی ل تورکیا بهێتە چارەسەرکرن، لێ مخابن تشتێ نها دیارە نە ئاکپارتیێ چو پرۆژە هەنە و نە ژی هێزێن دی دخوازن ب جدی کار بۆ چارەسەرکرنا پرسا کوردی بکەن، ژ بەر ڤێ یەکێ ژی ئەز وەسا دبینم پشتی هەلبژارتنان ژی دێ رەوشا نها یا ئالۆز ل تورکیا بەردەوام بیت.
