ئاکپارتی ژ بۆ باژێرڤانیا ستەنبۆلێ چاڤەڕێی هەلوەستێ کوردانە
ل گۆر دووماهی راپرسیێن ل تورکیا هەکە نها ل ستەنبۆلێ هەلبژارتنێن باژێرڤانیان بهێنە کرن بەربژارێ ئاکپارتیێ نەشێت ل هەمبەر یێ پارتا کۆماری سەرکەڤیت و ژ بۆ ڤێ یەکێ ژی ئاکپارتی چاڤەرێی هەلوەستێ کوردانە، چونکی دەنگێ کوردان دێ سەرۆکاتیا باژێرڤانیا ستەنبۆلێ ئێکلا کەت.
کۆمپانیێن راپڕسیێن وەکو سۆنار، ئۆپتمار، یۆنەیلەم، مەترەپۆل و چەندین کۆمپانیێن دی ئەنجامێن راپڕسیێن خوە یێن ڤێ مەهێ دیار کرن، ل گۆر ئەنجامێن راپرسیان هەتا نها ل باژێرێ ستەنبولێ هەلبژارتنێن باژێرڤانیان بهێنە کرن، ئەکرەم ئیمام ئؤغلۆ بەربژارێ پارتا کۆماری ٣٪ ل پێش بەربژارێ ئاکپارتیێ یە.
بەرپرسەکێ ئاکپارتیێ ژی کو نەخواستیە ناڤێ وی بهێتە ئاشکرا کرن بۆ رۆژناما مللیەت یا تورکیا دیار کریە، د هەلبژارتنێن باژێرڤانیان یێن بەری چار سالان دا ژ بەر دەنگێ کوردان پارتا کۆماری شیا ل هەر دو باژێرێن مەزن یێن تورکیا ئانکۆ ل ئەنقەرە و ستەنبولێ سەرکەڤیت، لێ ڤێجارێ کورد هەموو دەنگێ خوە نادەنە بەربژارێ پارتا کۆماری و راپرسیێن نها ژی نیشا ددەن بەربژارێ پارتا کۆماری ب رێژەیەکا زۆر کێم ل پێش بەربژارێ مە یە، هەکە ئەم کار بکەین و بشێین پشتەڤانیا کوردان بدەستڤە بینین دێ شێین ستەنبول و ئەنقەرە ژ دەستێ پارتا کۆماری دەرخینینن.
هەمان بەرپرسی ئەو یەک ژی دیار کریە، بۆ وان وەکو ئاکپارتی هەر دو باژێرێن مەزن یێن تورکیا ئانکۆ ئەنقەرە و ستەنبول گەلەک گرنگن، ب تایبەتی ژی ستەنبول، چونکی رەجەب تەیب ئەردۆغانێ سەرۆکێ ئاکپارتیێ دڤێت ب هەر رەنگێ هەی ڤێجارێ سەرۆکاتیا باژێرڤانیا ئستەنبولێ ژ دەستێ پارتیا کۆماری دەرخینیت، ژ بەر ڤێ یەکێ هەتا دەمێ هەلبژارتنان دبیت گەلەک گوهۆڕینێن نەچاڤەڕێ کری ل تورکیا روو بدەن.
چاڤدێرێن سیاسی دیار دکەن، ل هەر دو باژێرێن مەزن یێن تورکیا ب تایبەتی ژی ل ستەنبولێ کو رێژەیەکا ئێکجار زۆر کورد دژین سەرۆکاتیا باژێرڤانیا ستەنبولێ دێ ب دەنگێ کوردان هێتە ئێکلاکرن، چونکی بەری چار سالان ژی هەر دیسان ب دەنگێ کوردان ئەکرەم ئیمام ئۆغلۆ شیا سەرکەڤیت و ڤێجارێ ژی ئاکپارتی چاڤەرێی ڤێ یەکێ یە، کو کورد دەنگێ خوە نەدەنە ئیمام ئۆغلۆیی، چونکی ڤێجارێ پارتا دەم بەربژارێ خوە هەیە و هەکە کورد دەنگێ خوە نەدەنە پارتا کۆماری، شانسێ بەربژارێ ئاکپارتیێ دێ زێدەتر بیت.
ئەو یەک د دەمەکێ دایە، بەری نها ئەندامەکێ سەرکردایەتیا پارتا کۆماری دیار کربوو، رێککەفتنەکا نهێنی د ناڤبەرا ئاکپارتیێ و پارتا دەم دا هەیە و هەکە ئاکپارتی شیا سەرۆکاتیا باژێرڤانیا ستەنبولێ ب پشتەڤانیا کوردان بدەستڤە بینیت، دبیت پشتی هەلبژارتنان قۆناغەکا نوو یا ئاشتیێ و چارەسەرکرنا پرسا کورد ل تورکیا دەستپێ بکەت، ژ بەر ڤێ یەکێ ژی نها ئاکپارتی ب هەموو رەنگەکێ یێ کار دکەت دا بشێت سەرۆکاتیا باژێرڤانیا ئستەنبولێ ژ دەستێ پارتا کۆماری دەرخینیت.
