ئاگر ژدەهمەنێن مرۆڤی هەلدبیت
مستەفا مەلا سلیم ئاكرەیی
پشتی من كۆمبونەكا نهێنی دگەل چەند هەڤالەكا ل چۆلی كری، مە بریادا هندەك بەلاڤۆكا ببینە باژێرێ بەغدا و لسەر هەڤالێن زانكۆیێ بەلاڤە بكەین، من خۆ بەرهەڤكر كو ل سپێدی ب ڕێ بكەڤم و بەرەڤ باژێرێ بەغدا بچم، لێ ل شەڤێ تاكو بوویە سپێدە ئەز دهزراندا ئالۆز بووم؛ چونكە ئەڤ كارێ ئەز دكەم گەلەگ یێ مەترسییە، چێدبیت ژیانا خۆ لسەر دابنێم، لێ هەر چەوا بیت من ب ئەركەكێ نیشتیمانی دزانی و من وەسا دانا بوو هەر ڤی كاری جێبە جێ بكەم، لەوما من بریارا دوماهیێ دا كو بەرەڤ باژێرێ بەغدا بچم، هێژ سپێدە بوو بەری ب ڕێ بكەڤم ژنشكەكێڤە هەڤالەكێ من هات و گۆتە من: تو هێژ نەچووی؟ من گۆتێ: نەخێر نوكە دێ ب ڕێ كەڤم. سپێدە بوو، رۆژەكا سڕ و سەقەم بوو، لێ دونیایەكا بێدەنك بوو و تەیروتەوال ل ئەسمانی دفڕین و هاتووچونا خەلكێ باژێری یا سروشتی نەبوو، جاران وەكی ئەڤ حالەتە چێدبوون دا بێژن دەنگەك دێ ل دنیایێ هێت، یانژی بیڤەلەرزكەك دێ هێت، ئەز دڤان هەردو هزراندا بووم و بەلاڤۆكێن نهێنی یێن حزبی دبن فانیلێ خۆدا من ڤەشارت بوون، لدەمەكی بەری بگەهمە باژێرێ مویسل، ئەم سەر مەفرەزەكا لەشكرێ مللی هەلبووین و داخازا ناسناما ل مەكر، ب هەر حال ئەم قورتالبووین، تاكو گەهشتیمە بەغدا ترمینالێ (علاوی الحلە) هێژ ئەم ل پاسێ نەهاتینە خوار، مەفرەزەكا ئاسایشا بەغدا ترومپێلا مە دوور پێچكر و من گۆت هندە ئەز ب دوماهی هاتم، دەما كو ئەم ل پاسێ هاتینە خوارێ گۆتە مە هەر هەمی ل رەخ پاسێڤە ڕێزبن دێ هەوە پشكنین و ئێكی ژ وان ئاماژە ب من دا و گۆتە ئاسایشێ ئەڤە ئەوە، هینگی ئەز ل رێزا شەشێ بوم و هەڤالەكێ من ل پشت من بوو، گۆتە من ئەو هێژ یێن مژویلن تو دشێی خو ڤەرەسینی بۆ پشت پاسێ، من ژی دەم و دەست ئاخفتنا وی ب جهئینا و ب لەز ب تڕومبێلەكا تەكسی سیاربووم و چوومە بەشێ نافخویی ل( ئەبو غرێب) و دەر حال من ئەو بەلاڤۆك لسەر بانێ بەشێ نافخۆیی سۆتن.. لێرە گۆمان بۆ من چێبوو..! باشە چوا وان زانی من بەلاڤۆكێن ڤێ؟! .. تا نهۆ ئەزێ بگۆمانم و راستە دبێژن ئاگر ژدەهمەنێن مرۆڤی دبەربیتە مرۆڤی!
