ئایدن ئۆتاستانی نووترین كلیپا خوه به‌لاڤكر
ئه‌ڤرۆ:
هونه‌رمه‌ند (ئایدن ئوستان)ی نووترین به‌رهه‌مێ خوه بناڤێ (من و تۆ) ب شێوه‌یێ ڤیدیۆ كلیپ به‌لاڤكر و ئه‌ڤ كلیپه ل ئسپانیا هاتیه وێنه‌كرن و به‌رهه‌مئینان.
ئایدن ئوستان، پشتی به‌لاڤكرنا دووماهی ئه‌لبۆما خوه یا سترانان (من و تۆ) نووترین به‌رهه‌مێ وی یه كو ژ په‌یڤ و ئاوازێن وی بخوه‌نه، بۆ جارا ئێكێ یه ئه‌و په‌یڤان بۆ سترانه‌كێ بنڤیسیت، ئه‌ڤ سترانه ل كوردستانێ و ئسپانیا هاتیه تۆماركرن و (رێباز قاسم) ی كارێ مۆزیكێ بۆ كریه.
ناڤهاتی ئاماژه دا وێ چه‌ندێ كو چیرۆكا ڤێ سترانێ دناڤبه‌را دو كه‌سان دایه كو د دو ژییێن جودا و جیهانه‌كا جودا دانه و حه‌ز ژ هه‌ڤدو دكه‌ن و دڤێن پێكڤه جیهانه‌كا جودا دروست بكه‌ن كو یا پری حه‌زژێكرن و به‌خته‌وه‌ری بیت و هه‌ر وه‌كو رووداو به‌لاڤكری ڤیدیۆ كلیپا ناڤهاتی ژ ده‌رهێنانا (مانوێل میرایه) و ل كه‌نالێ تایبه‌تێ ئایدن ئوستان ل یوتیوبی هاتیه به‌لاڤكرن و بڕیاره ل سالا 2023 هه‌مان هونه‌رمه‌ند ئه‌لبۆما خوه یا دویێ یا سترانان به‌لاڤ بكه‌ت.
ئایدن ئوستان، ل سالا 1982 ل سلێمانیێ ژدایكبوویه و نوكه ل ئسپانیا دژیت، بۆ ده‌مێ دو سالان ل ئه‌كادیمیا ئوركێسترایا سلێمانیێ خواندیه و ده‌ستپێكا كارێ وی یێ هونه‌ری بۆ سالا 1997 ڤه‌دگه‌ڕیت، به‌رهه‌مێ وی یێ ئێكێ بناڤێ (تارمایی خه‌م) هاتیه به‌لاڤكرن، پشتی چوویه ئورۆپا هه‌تا سالا 2020 ژ كارێ هونه‌ری ڤه‌قه‌تیابوو و دووباره ب به‌لاڤكرنا چه‌ند به‌رهه‌مان ده‌ست ب كارێ هونه‌ری كریه ڤه، د ده‌مێ ده‌رڤه‌ی وه‌لاتی دا ل ئه‌كادیمیا 26ی ئازاری ده‌نگ ل ئیسپانیا خواندیه و نووترین ئه‌لبۆما خوه بناڤێ (ناهێته ژبیركرن) ل سالا 2022 به‌لاڤكریه كو ژ نه‌هـ تراكان پێكدهێت، تشتێ جودا د ڤێ ئه‌لبۆمێ دا ناڤونیشانێن هه‌موو سترانان ب هوزانه‌كێ وه‌كێ ستران پێشكێشكریه كو تایبه‌تمه‌ندیه‌كا دی دایه ئه‌لبۆمێ، هونه‌رمه‌ندێ ناڤهاتی به‌رهه‌مه‌كێ دوقۆلی دگه‌ل هونه‌رمه‌ند (كه‌مال محه‌مه‌د) به‌لاڤكریه، هه‌روه‌سا به‌رهه‌مه‌كێ دی یێ دوقۆلی دگه‌ل هونه‌رمه‌ندێ ئسپانی (ئێڤا) ب هه‌ر دو زمانێن ئسپانی و كوردی هه‌یه.
