ئسرائیلێ داخواز ژ ئەمریکا کریە هێزێن خوە ل سووریێ بهێلیت
بەرپرسەکێ ئسرائیلێ دیار کریە د سەرەدانا نەتانیاهۆ یا بۆ ئەمریکا دێ بابەتێ هێزێن ئەمریکا یێن ل سووریێ ژی هێتە ئێکلا کرن و ئسرائیلێ دڤێت هێزێن ئەمریکا ل سووریێ بمینن و پڕانیا وەزیرێن ترامپی ژی ل گەل ڤێ یەکێ د رەوشا نها دا باشترە هێزێن ئەمریکا ل سووریێ بمینن.
بەرپرسەکێ وەزارەتا دەرڤە یا ئسرائیلێ دیار کریە، هەفتیا بهێت سەرۆک وەزیرێن ئسرائیلێ دێ چیتە ئەمریکا و دێ ل گەل سەرۆکێ ئەمریکا کۆمبیت، د کۆمبوونێ دا دێ بەحسێ گەلەک بابەتان هێتە کرن و ب تایبەتی ژی دێ بەحسێ هێزێن ئەمریکا یێن ل سووریێ هێتە کرن، بەری نها ترامپی دخواست هێزێن ئەمریکا ل سووریێ نەمینن، لێ نها رەوشەکا نوو هاتیە پێش، چونکی گەلەک ژ وەزیرێن ترامپی ل گەل ڤێ یەکێ نە جارێ هێزێن ئەمریکا ل سووریێ بمینن و د رەوشا نها دا ڤەکێشانا هێزێن ئەمریکا ژ سووریێ دێ زیانەکا خوە یا گەلەک مەزن بۆ بەرژەوەندیێن ئەمریکا هەبیت و ژ بەر ڤێ یەکێ ژی هێشتا ترامپی بریارا دووماهیێ نەدایە و د هەڤدیتنا ل گەل نەتانیاهۆیی دا ئەو بابەتە دێ هێتە ئێکلاکرن.
هەمان بەرپرسی ئەو یەک ژی دیار کریە، بەری نەتانیاهۆ بچیتە ئەمریکا داخواز ژ ترامپی کریە کو هێزێن ئەمریکا ل سووریێ بمینن، چونکی نها رەوشا سووریێ گەلەک ئالۆزە و هەکە ئەمریکا هێزێن خوە ڤەکێشیت دێ داعش ژ ئالیەکێ و تورکیا ژی ل ئالیێ دی ئێرشی هێزێن سووریا دیموکرات کەن و ئەو یەک دێ زیانەکا خوە یا گەلەک مەزن بۆ ستراتیژیا ئەمریکا ل سووریێ هەبیت و هەروەسا دشێت مەترسیێن مەزن بۆ ئسرائیلێ ژی دروست بکەت.
هەمان بەرپرسی ئەو یەک ژی دیار کریە، ئسرائیلێ بریار دایە ل هندەک دەڤەرێن ستراتیژی ل سووریێ بمینیت و ژ بۆ پاراستنا خوە دێ هێزێن زێدەتر ژی رەوانەی هندەک دەڤەران ل سووریێ کەت، چونکی ئسرائیلێ نەڤێت ئاخا سووریێ ل دژی وێ بهێتە بکارئینان.
چاڤدێرێن سیاسی ژی دیار دکەن، سەرەدانا نەتانیاهۆ بۆ ئەمریکا گەلەک یا گرنگە، چونکی دێ بابەتێ ئیرانێ، ئالۆزیێن ل رۆژهەلاتا ناڤین و ب تایبەتی ژی رەوشا سووریێ هێنە گەنگەشە کرن و بێگومان ترامپ چو بریارەکێ نادەت کو ب دلێ ئسرائیلێ نەبیت، ژ بەر ڤێ یەکێ ژی پشتی سەرەدانا نەتانیاهۆ یا بۆ ئەمریکا دێ گەلەک پێشڤەچوونێن نوو ل دەڤەرێ روو دەن.
ل گۆر باوەریا چاڤدێرێن سیاسی مانا هێزێن ئەمریکا ل سووریێ ب تەمامی د بەرژەوەندیا کوردێن سووریێ دایە، چونکی وی دەمی تورکیا دێ نەچار بیت سیاسەتا خوە ل هەمبەر کوردێن سووریێ بگوهۆڕیت، هەروەسا ئیدارا نوو یا شامێ ژی دێ نەچار بیت پڕانیا داخوازیێن کوردان قەبوول بکەت.
