ئسرائیل: خوە بۆ شەڕەکێ نوو بەرهەڤ دکەین
سەرۆک وەزیرێن ئسرائیلێ راگەهاند، شەڕێ وان ل غەزە بەر ب دووماهیێ ڤە دچیت، ئسرائیلێ شیا ل غەزە نێزیکی وێ ئارمانجێ بیت یا کو مە دڤیا و نها خوە بۆ قۆناغەکا دی یا شەڕی بەرهەڤ دکەین و دێ پشکەکا مەزن یا هێزێن ئسرائیلێ ژ غەزە بۆ سنۆرێ لوبنانێ هێتە ڤەگوهاستن و نها وەکو ئسرائیل خوە بۆ شەڕەکێ نوو بەرهەڤ دکەن.
بنیامین نەتانیاهۆ ئەو یەک ژی دیار کر، حزبوللا لوبنانێ بوویە مەترسیەکا گەلەک مەزن و ژ ناڤ ئاخا لوبنانێ ئێرشی هندەک دەڤەرێن ئسرائیلێ دکەت، وەکو ئسرائیل وان بریار داینە دەست ب ئێرشێن مەزن ل دژی حزبوللا لوبنانێ د ناڤ ئاخا لوبنانێ دا بکەن، دڤێت مەترسیا حزبوللا لوبنانێ ژی ل سەر ئسرائیلێ نەمینیت و گۆت: (وەکو ئسرائیل مە دڤێت مەترسیا حزبوللاهێ ل سەر ئسرائیلێ ژناڤ ببەین، ژ بەر ڤێ یەکێ ژی هندەک ئارمانج د ناڤ ئاخا لوبنانێ دا هاتینە دیار کرن و دێ د دەمەکێ نێزیک دا هێزێن ئسرائیلێ دەست ب ئێرشەکا بەرفرەه کەن).
