ئسرائیل: دێ ب توندی بەرسڤا هەر ئێرشەکێ دەین
سەرۆک وەزیرێن ئسرائیلێ راگەهاند پشتی ئێرشا مۆشەکی یا حزبوللا لوبنانێ بۆ سەر ئسرائیلێ وان ژی ئێرشی چەندین بنگەهێن سەربازی یێن حزبوللا لوبنانێ ل باشووری وی وەلاتی کرینە و زیانێن مەزن ژی گەهاندینە حزبوللاهێ و وەکو ئسرائیل ئەو دێ ب توندی بەرسڤا هەر ئێرشەکێ دەن.
ل ئالیێ دی وەزارەتا بەرگریێ یا ئسرائیلێ ژی راگەهاند د ئەنجاما ئێرشا مۆشەکی یا حزبوللاهێ بۆ سەر ئسرائیل چەند وەلاتی بووینە قوربانی و ژ بەر ڤێ یەکێ ژی وان ب توندی بەرسڤا حزبوللاهێ داینە و نها ژی وان خوە بۆ هەر پێشهاتەکێ ژی بەرهەڤ کرینە.
ناسر کەنعانی پەیڤدارێ وەزارەتا دەرڤە یا ئیرانێ ژی راگەهاند، یا ئسرائیل دکەت تاوانەکا مەزنە و بنپێکرنا هەموو قانوونێن نێڤدەولەتی یە، لێ مخابن وەلاتێن ئیسلامی وەکو پێدڤی ل هەمبەر ئسرائیلێ خوەدان هەلوەست نینن و وەلاتێن رۆژئاڤایی ژی ل هەمبەر تاوانێن ئسرائیلێ د بێدەنگن.
چاڤدێرێن سیاسی ژی دیار دکەن، ئەگەرێ هندێ هەیە شەڕێ نها د ناڤبەرا ئسرائیلێ و حزبوللاهێ دا بەرفرەهتر ببیت، چونکی حوسیێن یەمەنێ و گرۆپێن دی یێن چەکدارێن سەر ب ئیرانێ خوە بۆ ئێرشێن دژوار ل سەر ئسرائیلێ بەرهەڤ دکەن و ل هەمبەر دا ئسرائیلێ ژی دڤێت ئێرشێن خوە یێن ل سەر باشوورێ لوبنانێ دژوارتر لێ بکەت و ئەو یەک دێ رۆژهەلاتا ناڤین ژی تووشی شەڕەکێ نوو و دژوار کەت.
ل گۆر باوەریا چاڤدێرێن سیاسی ئەمریکا دێ ب هەموو شیانێن خوە پشتەڤانیا ئسرائیلێ کەت و ژ بەر ڤێ یەکێ ژی هەتا نها ئیرانێ بریار نەدایە ببیتە پشکەک ژ شەڕی.
