ئسرائیل: مه نه‌خشێ ژناڤبرنا به‌رنامێ ئه‌تۆمی یێ ئیرانێ دارێتیه
ب، سه‌رجان مه‌حمود:
ئاڤیڤ كۆچاڤی سه‌رۆك ئه‌ركانێ گشتی یێ له‌شكرێ ئسرائیلێ راگه‌هاند كو گه‌له‌ك ئاشكرایه ئیران به‌رده‌وامیێ دده‌ته به‌رنامێ ده‌وله‌مه‌ندكرنا یۆرانیومێ و دخوازیت ببیته خوه‌دان چه‌كێن ئه‌تۆمی و ئه‌و یه‌ك مه‌ترسیێ ل سه‌ر هه‌موو جیهانا پێشكه‌ڤتی دروست دكه‌ت و گۆت: (ژ بۆ نه‌هێلانا مه‌ترسیا ئیرانێ مه ژی ئاماده‌كاریێن باش كرینه و د ره‌وشا نها دا ل سنورێ باكورێ وه‌لاتێ مه حه‌تا ئاسته‌كێ باش هێزێن ئیرانێ هاتینه ژناڤبرن و پیلان و كارێن مه بۆ لاوازكرنا ئیرانێ د وارێ سه‌ربازی دا ب سه‌ركه‌ڤتی به‌رده‌وام دكه‌ت).
سه‌رۆك ئه‌ركانێ گشتی یێ له‌شكرێ ئسرائیلێ هه‌روه‌سا راگه‌هاند ژی كو وان بۆدجا پاراستنا وه‌لات زێده‌تر كرینه و ژ بۆ پاراستن و ئێمناهیا وه‌لات چ پێدڤی بیت دێ هێته كرن و گۆت: (ل رۆژهه‌لاتا ناڤین ئارامی نینه و سه‌ده‌مێ سه‌ره‌كی ژی ده‌ستێوه‌ردانێن ئیرانێ یه و بۆ ڤێ چه‌ندێ وه‌ك كارێ ده‌ستپێكێ ئه‌م هه‌ول دده‌ین كاریگه‌ریا ئیرانێ ل رۆژهه‌لاتا ناڤین كێم بكه‌ین، ژ به‌ر هندێ ژی مه ده‌ست ب به‌رهه‌ڤیێن ته‌مام كرینه، مه پێ باشه كو هه‌موو وه‌لاتێن جیهانێ هه‌ست ب مه‌ترسیا ئیرانێ بكه‌ن و هاریكاریا مه بكه‌ن، لێ هه‌كه وه‌لاتێن جیهانێ بێده‌نگ بن ژی ئه‌م وه‌كو ئسرائیل به‌رهه‌ڤین و دێ یا پێدڤی ل دژی ئیرانێ كه‌ین).
