ئـەرێ ئـەم ژی د مێژوویـێ دا دنڤسینە؟!
زهێر كۆرەماركی
گەلەك مێژوونڤێسان ل سەر كوردان یا نڤێسی و وەكی خۆ و وەكی وان ڤیای یا نڤێسی، گەلەكا گرنگە مێژوویا كوردان ب ئەقلێ كوردی و دەست و تلێن وان ب خۆ بهێتە نڤێسین، داكو ئەو مێژوویا هاتیە دزین و چەوت هاتیە نڤێسین ب دەستێن مێژوونڤێسێن كورد بهێتە راستڤەكرن. كوردان نەخۆشی و ئێش و ئازار مەزن یێن د مێژوویێ دا دیتن و چێشتین، وەلاتێ وان كوردستان هەرتم ئارمانجا دوژمن و نەیاران بوویە، ژبەركو خاكەكا پڕی كانزا و مەعدەن بوویە و هەمی خێر و خێرات بوویە، ئەڤە ژبلی جوانیا سروشتێ وەلاتێ وان. كورد نەتەوەیەكێ زیندییە ب خەبات و سەرهلدان و تێكۆشانا خۆ هەبوونا خۆ یا سەلماندی و هەمی بزاڤێن كرین مێژوویا خۆ ساخ بكەنەڤە د قووناغێن جودا جودا دا و ب شێوەیەكێ جودا. هەر مێژوویەكا هەبیت روحا هەی روحا مێژوویێ راستینە، گرنگە ئەم كوردان ل راستیا مێژوویا خۆ بگەڕین و ئەوا خەلكی وەكی خۆ ئەم داینەناسین و بۆ بەرژەوەندیا خۆ ئەم پێناسەكرین دویڤچوونێ ل سەر بكەین راستڤەكەین بۆ جیهانێ بدەینە خۆیاكرن. نابیت مێژوویێ بەس بۆ خواندنێ بكاربینین، بەلكو دڤێت ئەم مێژوویێ بخوینین و پەند و دەرسان ژێ وەربگرین و ئەڤرۆیا خۆ و سوبەهیا خۆ ژی ل سەر ئاڤا بكەین. خۆ گەلەك گرێدان ب مێژوویێ ڤە بێی پەند ژێوەرگرتن و چنەكرن بۆ سبەهی و بەس بۆ مەدح و سەنایا (ئانكۆپیاهەڵدان) بیت، هەر بێژین ئەم كورد د هۆسا و د هۆسا بووین و مە یا هۆكریە هەنێ، ئەڤە خۆكوشتنە. گرنگە ئەسل و فەسلێ خۆ بزانی و سوبەهیەكا جوان و هەژی ل سەر ئاڤابكەین، ئەو نەتەوەیێن خۆ گەلەك ب مێژوویێ ڤە گرێددەن و خۆ ب مێژوویا خۆ قەبە و مەزن دكەن و مێژوویا خۆ بەس بۆ هندێ دخوینن و بكاردئینن، ئەو گەل و نەتەوە یێ پاشكەفتییە و چ بۆ سوبەهیا وی ڤێ نینە؟ هیگل دبێژیت:(گرنگترین سوودی مێژوو ئەوە كو مێژوو سوودی نینە)، ئەڤە دیتنا فەیلەسۆفەكی یە لسەر مێژوویێ ئەرێ ئەڤە راستە و ئێدی مێژوویێ نەخوینن و لسەر رانەوەستین، نەخێر گرنگە ئەم مێژوویێ باش بخوینین و لسەر راوەستین چونكی مێژوو یێ گەلەك سوود یێن هەین دڤێت مرۆڤ بخوینیت چونكی یا پڕە ژ هزر و گۆتۆبێژو رێنمایا بۆ مرۆڤایەتیێ.مێژوونڤێسین كاركرنە لسەر رابردووی و مێژوو بخۆژی كۆمەكا رووداو دەنگۆباسانە هندی كەڤن ببن دەم ب سەرڤە بچن بهایێ زێدەتر ددەتە خۆ، چونكی چۆنە یان سەفەرەكە بۆ زەمانەكێ دی ئانكو رابردوویە، ئانكو چۆنە بۆ ناڤ ژیانا باب و كالێن خۆ و یێن خەلكی ژی.
هندەك دبێژن مێژوو بۆ ژیانێ بیرۆكەیە وەختێ ئاگر هاتییە دیتن ژیانا مرۆڤان خۆشتر لێهات هۆسا هەر تشتێ نوو پەیدا دبیت ژیانێ ئاسانتر خۆشتر لێدكەت. گەلەك دیتنێن جودا لسەر مێژووەیێ یێن هەیین هندەك دبێژن مرۆڤ مێژوویێ چێدكەن هندەكێن دی دبێژن مێژوو مرۆڤان چێدكەن هەر چاوا بیت مێژوویێ یاسا خۆ یاهەی ب درێژیا میژوویێ مرۆڤێن بهێز دزاڵن ب سەر یێن لاواز، یا ژ منڤە مرۆڤ پتر مێژوویێ چێدكەت كو مێژوو مرۆڤان چێدكەت.گەلەكا گرنگە لێكۆلین لسەر مێژوویێ بهێتەكرن و ببەلگەنامە بسەلمینن و راستیان دیار بكەن،كا چاوا ل مەیدانا شەڕی چەك پێدڤییە؛ هۆسا ل مەیدانا مێژوویێ ژی بەلگەنامە دپێدڤینە. گەلەكا فەرە گرنگی ب نڤێسینا مێژوویێ بهێتەدان چونكی مێژوویا هەر نەتەوەیەكی ناسنامە و شەڕەف و كەرامەتا وی نەتەوەیە، هەكە تو گرنگیێ ب مێژوویا خۆ نەدەی ئەڤە نیشانا دەرچووناتە یە ژ هەستێ نەتەوایەتیێ و ئەگەر ئەو نەما ئەڤە ئێدی تۆ بەرامبەر خاك و نشتیمان و زمان خۆ هەست ب بەرپرسیایەتیێ ناكەی كو ئەڤە ژی مەترسییە لسەر قەوارێ هەرنەتەوەیەكی.ئەگەر كورد نەتەوەیەكێ كەڤنار و خودان مێژوویەكا رهكوور دوور نەبایە خۆ لبەر بارۆڤە و هێرشێن بێ وژدانەیا دژمن و نەیارێن خۆ نەدگرت و دا ژناڤچیت، لێ چونكی خودان مێژوویەكا رەسەن بوویە هەر دەم بزاڤێن كرین مێژوویا بنڤێسن و نوو بكەن هەبوونا خۆ یا پاراستی و یێن بوویە یاریكەر د مێژوویێ دا هندەك جاران باش بینە هندەك جاران خراب بووینە.
یا شاشە ئەم بچینە د ناڤ مێژوویێ دا و بۆ خۆ بالیفك و لحێفان ببەین بنڤین و بێژین مانێ ئەم گەل و نەتەوەیەكێ رەسەنین و خودان مێژوویەك كەڤنار شارستانیەتین، ڤێجا دێ پالدەین. دێ هۆسا زیان و زەرەرەكا مەزن ل خۆ و مێژوویا خۆ كەین، مێژوو بۆ هندێ یە تو سوبەهیەكا گەش و مەزن ل سەر ئاڤا بكەی. دبێژن جارەكێ كچەكێ پرسیارەك ژ بیرمەندێ مەزنێ ئیراقێ (حسێن سەعدوون)ی كر گۆتێ: ئاریشەیا مە ل گەل مێژوویێ چیە؟ د بەرسڤێ دا گۆتێ: ئەم د مێژوویێ دا دنڤستینە؟ ئەرێ پا ئەم دچاواینە..؟
