ئـەم گـرنگـیێ ب هێز و شـیانێن گـەنجان ددەین
بێوار حەمدی:
ڕێڤەبەرێ لاوان ل دهۆكێ د دیدارەكێ دا بۆ ڕۆژناما ئەڤرۆ دیار كر كو مەرەم ژ هەبوونا ناڤەندێن وەرزش و لاوان ڕێكخستنا چالاكیێن وەرزشی و هزری و پێشڤەبرنا گەنجانە و گۆت: ئەم بەردەوام خولێن جورا و جور ژ بۆ گەنجان ڤەدكەین و ب ڕێیا ووركشوپ و سمیناران بزاڤان دكەین گەنجان چالاك بكەین.
هەكار محەمەدئەمین ڕێڤەبەرێ لاوان ل پارێزگەها دهوكێ گۆت: (ئەم وەكو رێڤەبەریا لاوان بەرپرسین ژ ناڤەندێن وەرزش و لاوان كو ل سەر ئاستێ پارێزگەهێ مە 11 ناڤەند هەنە و ل دهۆكێ مە دوو ناڤەند هەنە).
هەكار گۆتژی: (مەرەم ژ هەبونا ڤان ناڤەندان ژ بۆ رێكخستنا چالاكیێن وەرزشی و هونەری و بەر ب پێشڤەبرنا شیانێن گەنجانە و ب ڕێیا ووركشوپ و سمینار و خولان ئەم بزاڤان دكەین گەنجان چاڵاك بكەین).
رێڤەبەرێ لاوان د بەردەوامیا ئاخفتنێن خودا دیار كر كو ئەو خولێن جوراو جور ژ بۆ گەنجان رێك دئێخین وەكو خولێن (زمانی، فێركرنا قوتابیان، كۆمپیوتەر، بكارئینانا تەكنولوژیایێ، هونەری .. و گۆت: (هەر د بەرێ دا مە ئەڤ چالاكیە ژ بۆ گەنجان ئەنجام داینە و هەتا نوكە ژی د بەردەوامین، ژبەركو ل جیهانێ هەموویێ ئەڤ ناڤەندە كار دكەن ژبۆ پێشئێخستنا شیانێن گەنجان و گرنگیێ ب هێز و شیانێن وان ددەن).
هەكار محەمەدئەمین ئەوچەندە ژی دا زانین كو هندەك جورێن خولا هەنە بودجەیەكێ مەزن لێ دهێتە مەزاختن، لەوما د شیانێن مەدا نینە ئەم هەموو خولان ڤەكەین و گۆت: (د نوكەدا خولێن چێكرن و دروستكرنا شیانان بۆ گەنجان گەلەك د پێدڤینە، ژبەركو هەر بەهرەیەكا لدەف هەبیت ئەم پتر دێ شێین هاریكاریا وان كەین و لسەر بەهرەیا وان كار كەین داكو ئەو ژی بشێت بڤێ رێكێ داهاتەكی بخۆ پەیدا بكەت).
