ئـەوێ ب شـەهیدبـوونـێ بـژیت، ب مۆشەكێن غـەدرێ نـامریت
نیهاد سـالـح رەشـید
ئازادی نەخەلاتە ب ساناهی بهێتە بەخشین، بەلكو قوربانیدانە ب خوینێ دهێتە نڤیسین. دیسا كوردستان كەفتە بەر پەلامارەكا دوژمنكارانە و بێ پاساو، وەكو جەنابێ سەرۆك مەسعوود بارزانی ڕاگەهاندی: «پێشمەرگە ئازیزترین و بە نرخترین سەرمایەی گەلەكەمانە»؛ لەوما هەر تیرەكا غەدرێ ئاراستەی ڤێ هێزا پیرۆز بیت، هێرشە بۆ سەر ڕەوشت و كەرامەتا هەمی كوردەكی. ئەو مۆشەكێن ب نامەردی لاشێ گەنجێن مە دكەنە ئارمانج، نزانن كو هەر دلۆپەكا خوینا ڤان شەهیدان چرایەكێ نوی یە و مۆرەكا سۆرە ل سەر ناسنامەیا ئازادی و دەولەتبوونێ، كو دبیتە كەڤرەكێ بنگەهین ل شەنگستەیێ ئاڤاكرنا دەولەتا سەربەخۆیا كوردستانێ ل پاشەڕۆژێ دهێتە دانان.
كاروانێ شێرێن نەمر.. شەش ستێرێن گەش
شەش شێرێن نیشتیمانی؛ (كەیوان، رامین، ڕێبەر، پشتیوان، شەهاب، زكری) نە ب مرنێ، بەلكو ب شەهیدبوونێ ژیانەكا نوی دەستپێكرن. چیرۆكا شەهید كەیوان، دیرۆكەكا پڕ ل سەربلندی یا ڤێ نەتەوەیێ یە. كەیوان كوڕێ قارەمانەكێ بریندارێ شەڕێ تیرۆرستێن داعشە، ئەڤرۆ ب مۆشەكێن غەدرێ یێن ئیرانێ گیانێ خۆ فیدا كر. ئەڤە مەزنترین بەلگەیە كو كوردستان د ناڤبەرا بەرداشێن زۆرداریێ دا دهێتە گڤاشتن، بەلێ چ جاران ناهێتە شكاندن. كەیوان كو تەنێ دەه هەیڤ بوون جلیێن زاڤاینیێ پۆشین و هەڤژینا وی ل چاڤەرێیا جگەرگۆشەیەكێ بوو كو كەیوان نەگەهشتە وێ ڕۆژێ ب باوەش بكەت؛ بابێ وی یێ بریندار دبێژیت: «كەیوان یێ هەمی كوردانە، ئەو قوربانیێ خاكی یە و كورێ ڕێبازا بارزانی یە.»
ڕێبازا بارزان.. قوتابخانا شەرەف و مانێ
مەزنترین هێزا مە، لێڤەگەڕ و مەرجەعێ مە سەرۆك بارزانی یە. پتری سەد سالانە مە ب ڤێ ڕێبازێ خەبات یا كری و ئەم ل سەر ڤێ ئەزموونا گران یێن بەردەوامین. وەكو بابێ شەهیدەكی ب سەربلندی ڤە دبێژیت: «ئەم ب زووری كێم دمرین، ئەم هەر شەهید دبن، ئەم دزانین دێ كورێن مە شەهید بن، بەلێ ئەڤە ڕێبازا مەیە، ئەم دگەل بارزانی نە و چ جاران لێڤە نابین». ئەڤە فەلسەفا مللەتەكی یە كو ب مرنێ نامریت، بەلكو ب شەهیدبوونێ دژیت. هەر ئەو بابێ پڕ شەرەف دبێژیت: «ئەم فێری هندێ بووینە دەستان بدەینە چەكی بۆ «چوونێ» نەك بۆ «هاتنەڤە»؛ ئەگەر بنەمالا مە هەمی ببنە قوربانی، ئەم ڕێكا خۆ یا پیرۆز لا نادەین.»
مرادا شەهیدبوونێ و خۆڕاگرییا پۆڵایین
هەلوەستێ بابێ شەهید پشتیوان، مەزناهیا ڤێ نەتەوێ نیشا جیهانێ ددەت، دەمێ ب گرنژینڤە دبێژیت: «دڵتەنگ نینم، چونكو كورێن هەمی كوردستانێ ب كورێن خۆ دزانم.» ئەو ب باوەریەكا توند داكۆكیێ ل سەر وێ چەندێ دكەت كو سەر و مالێ مە فیدای بارزان و كوردایەتیێ بیت. هەروەسا، داستانا شەهید شەهاب، كو مرادا وی دڤیا شەهید بیت چونكو بنەمالا وان هەر شەهید دبن، ئەو ژی گەهشتە مرادا خۆ و ئەو پلا پیرۆز وەرگرت. پێنج برایێن وی ئامادەنە خۆ گۆری ئاخێ بكەن، ئەڤە پەیامەكا زەلالە: چەند مە شەهید بكەن، پتر هێزێ ددەنە مە. ٣٠ بریندارێن مە ب ئازارێن خۆ، داستانا خۆڕاگریێ دبەنە سەرێ چیا و ئاسمانی و دبێژنە دوژمنی: ئیرادەیا مە ناهێتە هەژاندن.
ئەم ب هەمان دەنگێ كەسوكارێن شەهیدان دبێژین: ژیانا بندەستیێ قەبوول ناكەین و ئازادیێ تنێ ب خوینێ دكڕین. سەرۆك، ئالا، پێشمەرگە، خاك و نشتیمان پیرۆزیێن مە نە كو ب چ مۆشەكێن ناهێنە هەژاندن. هەتا سەرۆك بارزانی مەرجەع و ڕێبەرێ مە بیت و هەتا دایكێن كورد ب ڤێ مەردیێ كورێن خۆ پێشكێشی نیشتیمانی بكەن، كوردستان دێ هەر ب سەربلندی مینیت، هەبوونا مە ب وان ڤەیە، و كەرەمەتا مە ب ڤێ خوینێیە؛ خوین بۆ رزگاری و ئازادی و دەولەتبوونێ یە.
