ئـەی گـەنج لیستا (٢٧٥) هێزا دەنگێ تەیە
ئادار هۆگر
ئەگەر گەنجەك بهێت و پرسیارێ بكەت ئەگەر چنە ئەز دەنگ بدەمە لیستا پارتی دیموكراتی كوردستان؟ دێ بەرسڤەكا ب بەلگە هەبیت وەل ڤی گەنجی بكەت لیستا ٢٧٥ بهەلبژێریت، ل سەر هەمی لیستێن دی یێن كو پشكدار د دەنگدانێ دا؟ دێ بەرسڤ ب بەلێ بیت، ژ بەركو سەرەرای وان هەمی ئاستەنگ و نەخۆشیێن هەرێما كوردستانێ كەفتیە تێدا، نەبوو ئەگەر ئەڤ پارتە لاواز و پاشڤە بزڤریت و كارێن ڤێ پارتێ ژ دەمێ دامەزراندنێ و هەتا نوكە دبەردەوامن و دێ بەردەوام ژی بین ل پاشەرۆژێ لێ ئەگەر تو بهەلبژێری.
دێ باس ل هندەك كاران كەین یێن پارتی ئەنجامدای ژ دوماهیك هەلبژارتن و هەتا نوكە. یا دەستپیكێ و یا كو د مفایێ گەنجان دا، ڤەكرنا سەنتەرێ راهێنەریێ بۆ بەهرەیێن گەنجان وەك كۆمپیوتەر و زمان و سەركردایەتی. پالپشتیا سەندیكا خوێندكار و لاوان. گرنگیدان ب پشكداریا گەنجان د سیاسەتێ دا و هەولدان ژبۆ دامەزراندنا وان و پەیداكرنا دەلیڤەیێن كاری. و ئەگەر باس ل مفایێ گشتی بكەین، باشتركرنا رێگاوبانان و ژێرخانەیێ، بەرفرەهكرنا خزمەتگوزاریێن حوكمەتێ یێن دیجیتالی وەكی “هژماری من”، بهێزكرنا ئێمناهیا هەرێمێ و چاڤدێریا بەردەوام یا ساخلەمی و ئابووری. سەرەرای هەمی فشارێن دەرەكی و ناڤخۆی هێشتا ئەڤ پارتە یا بەردەوامە و یا بهێزە و ب هەمی ئیرادەڤە كاردكەت دا كوردستانەكا نموونە ئاڤا بكەت.
داكو هەمی گەنج پشكداریێ د پرۆسەیا هەلبژارتنا دا بكەن و دەنگێ وان بۆ لیستا ٢٧٥ بیت، پێدڤییە گەنج ب شێوەكێ درست و تەمام بهێتە فێركرن بۆچی دەنگدان یا گرنگە و دێ شێت چ گوهۆرینان پەیدا كەت و هەروەسا چەند یا گرنگە ئەڤ گەنجە ب شێوەكێ ئازادانە و د بەرژەوەندیا خۆ و گشتی دا پارتا خۆ بهەلبژێریت وەك نوونەرێ كوردستانێ، و داكو كوردستان هەر یا ئاڤابیت. ل دوماهیێ یا گرنگە ئاماژێ ب هندێ بدەم ئەی گەنج، دەنگێ تە وەكی تۆڤەكێ بچویكە لێ گەلەك یێ ب هێزە، دەمێ تو دچی و دەنگی ددەی، تو هیڤیان دچینی بۆ وێ جیهانێ یاكو تە دڤێت تێدا بژی، نەمینە بێدەنگ ژبەركو بێدەنگی هیچ تشتەكی ناگوهۆریت. بلا دەنگێ تە بهێتە گوهلێبوون و گوهۆرینێ دروستبكەت و ب هیچ رەنگەكی نەهێلە كەس ژ پێش تەڤە بریارێ ل سەر پاشەرۆژا تە بدەت، هەرە و پشكداربە دەنگێ تە رەنگڤەدانە بۆ وێ پاشەرۆژا تو ل هیڤیێ.
