ئنگلترا چاڤه‌ڕٍێ خه‌ونا 55 سالانه و ئێتالیا بۆ ده‌ستڤه‌ئینانا ناسناڤێ یۆرۆ
ئه‌ڤرۆ ده‌مژمێر 10ی شه‌ڤ جه‌ماوه‌رێ وه‌رزشی ل پرانیا جیهانێ دێ چاڤ بۆ دیتنا یاریا دیرووكی بیت ئه‌وا دێ دناڤبه‌را هه‌ردو هه‌لبژارتیێن ئنگلترا خودانێن ئه‌ردی هه‌مبه‌ری هه‌ڤڕكا خوه هه‌لبژارتیێ ئیتالیا ژ چارچووڤێ فینالا یۆرۆیا 2020ێ ئه‌وا دێ ل یاریگه‌ها ویمبلی ل وه‌لاتێ ئنگلترا هێته كرن كو لدیڤ ده‌نگۆباسێن رۆژنامه‌ڤانی هنده‌ك پلێتێن چوونا ژوورا ناڤ یاریگه‌هێ دا گه‌هشتینه 60 هزار یۆرۆیان.
هه‌لبژارتیێ ئنگلترا گرێیا ده‌ربازبوونێ بۆ یاریا دووماهیا قاره‌مانیا ئۆرۆپا ڤه‌كر پشتی هه‌ر ژ ده‌ستپێكا قاره‌مانیێ كو ل 1960ێ نه‌شیایی بگه‌هیته ڤێ قۆناغێ و دووماهی ناسناڤێ وێ ل 1966ێ بوو ده‌مێ قاره‌مانیا جیهانێ ده‌ستڤه‌ئینایی ئانكۆ چاڤه‌ڕێ خه‌ونا ناسناڤه‌كێ دیه، ئه‌ڤرۆ دێ هه‌مبه‌ری مه‌زنترین تاقیكرنا ناسناڤێ ئێكێ یێ ئۆرۆپا هه‌مبه‌ری هه‌لبژارتیێ ئیتالیا بیت، خودانێن ئه‌ردی ل سه‌ر كیستێ هه‌لبژارتیێ دانیمارك ب دو گۆلان به‌رامبه‌ر گۆله‌كێ هاتیه دووماهیا یۆرۆ 2020 و بتنێ پێنگاڤه‌ك مایه بۆ ناسناڤی سه‌رباری 10 جاران پشكداری كریه بێی ده‌ستكه‌فت بوویه، لێ ئه‌ڤچاره جوداهیه‌كا مه‌زن دیاره ژبه‌ركو دێ دناڤ ئه‌رد و جه‌ماوه‌رێ خوه دا كه‌ت و هه‌روه‌سان پێكهاتیێ ئنگلترا ب باشترین یاریزانێن خودان شیانن و ب ئارمانجێن مه‌زنن، هه‌مبه‌ری وێ هه‌لبژارتیێ ئتیالیا ژی ب چه‌كێ خوه یێ كاریگه‌ر ژ هێلا گۆلپارێزیێ هه‌تا هێرشبه‌ری ئه‌ڤێ ده‌لیڤێ ژ ده‌ست ناده‌ت پشتی دووركه‌فتنا وێ ژ ناسناڤێ ئێكێ یێ یۆرۆیێ ل سالا 1968ێ و دیڤدا دو جاران گه‌هشتیه یاریا دووماهیێ لێ نه‌شیایه ناسناڤی بینیت ل سالا 2000ێ ل گه‌ل فرنسا ب دۆ گۆلان خوساره‌ت بووی و ل سالا 2012 گه‌ل ئسپانیا ب چار گۆلێن پاقژ تووشی خوساره‌تیێ بوویی و هیڤیێن ناسناڤێ دویێ ژ ده‌ستدایی، له‌ورا چه‌نگاوه‌رێن ئازووری باش دزانیت ژ ده‌ستدانا قاره‌مانیا یۆرۆ 2020 دێ باچا ویێ یا گران بیت و مێژوو دێ ب ئامار دیاركه‌ت كو د ماوێ 33 یاریێن لدیڤ ئێك چو هه‌لبژارتیان نه‌شیایه سه‌ركه‌فتنێ ل سه‌ر تۆماربكه‌ن، پێنه‌ڤێت ب هه‌موو شیانێن خوه ناهێلیت ئه‌ڤێ ده‌لیڤێ ژ ده‌ست بده‌ت و دێ بۆ ناسناڤێ دویێ شه‌ڕی كه‌ت هه‌تا دووماهیێ، بۆ زانین دادڤانێ هۆله‌ندی بیۆرن كۆیبرس دێ یاریێ بڕێڤه‌به‌ت.
د دیروكا یاریێن دناڤبه‌را هه‌ردو هه‌لبژارتیان دا 27 جاران یاریێن فه‌رمی و هه‌ڤالینی ئه‌نجامداینه، 10 سه‌ركه‌فتن بۆ ئیتالیا و هه‌شت بۆ ئنگلترا هه‌مبه‌ری نه‌ه وه‌كهه‌ڤیا، دووماهی یاری دناڤبه‌را وان دا ل مۆندیالا 2014ێ قۆناغا كۆمان ئیتالیا شیابوو ب دۆ گۆلان سه‌ركه‌فتنێ تۆماربكه‌ت، د یۆرۆیێ دا دو جاران هه‌مبه‌ری ئێك بووینه و هه‌ردو یاری ب سه‌ركه‌فتنا ئیتالیا بوو یا ئێكێ ل 1980 ژ قۆناغا كۆمان و یا دویێ ل سالا 2012 د قۆناغا چارێ دووماهیێ دا ب لێدانێن په‌نه‌لتیان بوو.
دهێنه پێشبینیكرن راهێنه‌رێ ئنگلترا گاریس ساوسگێت پشتبه‌ستنێ ب پێكهاتیێ دیاركری بكه‌ت كو ژ جۆردان بیكفۆر گۆلپارێز، كایل والكێر، هاری ماجوایێر، جۆن ستۆنز، لۆك شاۆ، دیكلان رایێس، كالڤێن فێلێس، ماسۆن ماۆنت، ره‌حیم ئسترلینگ، هاری كین و جادۆ سانتچۆ.
سه‌رباری هنگاڤتنا ستێرا ئیتالیا لیوناردۆ سبینازۆلا لێ رۆبێرتۆ مانشینیی گه‌شبینه ئاستێ هێلا به‌ره‌ڤانیێ به‌رده‌وامیێ بده‌ته به‌رگریێ كو دهێته پێشبینیكرن پێكهاتیێ خوه دێ ب جیانلۆجی دۆنارۆما وه‌كو گۆلپارێز، لیۆناردۆ بۆنوچی، جورجینۆ كێلێنی، جیۆڤانی دی لۆرێنزو، ئێمرسۆن بالمێری ، ماركۆ فیراتی، نیكۆلا بارێلا، جورجینیۆ، لۆرێنزۆ ئینسێنی چیرۆ ئیمۆبیلی و دیمینكۆ بیراردی.
