ئه‌حمه‌دێ موخلص یان ئه‌حمه‌دێ نالبه‌ند
( 4 و دووماهیك)
ماهر عبدالرحمن به‌رواری – ئه‌لمانیا
به‌رده‌وامیدان ب بابه‌تێ مه، یێ مه بۆ سێ خه‌له‌كان به‌حس كری و ئه‌ڤه ئه‌م گه‌هشتن حه‌له‌كا چارێ و دووماهیكێ، بابه‌بت ژی ده‌رباره‌یی ناڤێ دیوانا ئه‌حمه‌دێ موخلص و پاشناڤێ وی، ل ڤێرێ نڤیسه‌ڤان ل سه‌ر ڤی بابه‌تی (ناڤێ دیوانێ و پاشناڤێ موخلص و نالبه‌ند)، یێن بووینه دو ئالیی:
– هنده‌ك ژ وان یێن به‌ری نوكه دیوانێن ئه‌حمه‌دێ موخلص چاپ كرین، پاشناڤێ “نالبه‌ند” یێ كریه “امر الواقع” هه‌ست پێ دكه‌ن كو د شاشن د ڤی بابه‌تی دا، لێ دبێژن: هه‌لبه‌ستڤان ب ڤی ناڤی یێ مه‌شهۆر بووی و ناخوازین گوهۆرینان بكه‌ین و دێ ل سه‌ر ڤێ بریارێ به‌رده‌وام بین.
– مه ده‌مه‌كی پێشنیاركر كو بۆ ده‌مه‌كی ب ڕه‌نگی بنڤیسین ئه‌حمه‌دێ موخلص (نالبه‌ند) حه‌تا خانده‌ڤان لێ ڕابهێن و پاشی نالبه‌ندی ژێڤه كه‌ین.
– پشتی من و چه‌ند نڤیسه‌ڤانان ئه‌ڤ دیكۆمێنت و ده‌ستنڤیس دیتین و شرۆڤه كرین، ئه‌م ژێ پشتراست بووین كو پاشناڤێ نالبه‌ند و ناڤێ دیوانێ یێ شاشه و ژ نك خوه یێن بۆ داناین، مه هه‌می پاشناڤێن نالبه‌ند ژ كتێبێن خوه ڤه‌روژتن و به‌س موخلص دانا و ناخوازین ل سه‌ر شاشیان به‌رده‌وام بین.
ئه‌نجام و پێشنیار: د سه‌ر ڤان كێمیان ڕا، ئه‌و كارێ رحمه‌تی مه‌لا تاها مایی بۆ ئه‌حمه‌دێ موخلص كری باوه‌رناكه‌م كه‌س بكه‌ت و ئه‌كید براده‌ران ژی زه‌حمه‌ته‌كا مه‌زن یا پێڤه بری و جهێ ده‌ستخوشیێ یه و چ كار ژی بێ كێمی نابن و فه‌ره كێمی بهێن به‌حسكرن و چاره‌كرن.
ب هزرا من، به‌ری ئه‌ڤ دیكۆمێنته بكه‌ڤنه ده‌ست و ڕاستی بهێن زه‌لال كرن نۆرمال بوو هه‌ر ئێك ل دویڤ زانین و تێگه‌هشتنا خوه بنڤیسیت، لێ پشتی بۆ مه هه‌میان ڕاستی ئاشكرا بوون، حه‌قه ئێدی وان شاشیان ڕاستڤه كه‌ین و د نڤیسینێن خوه دا بكارنه‌ئینن. یاسا و ویژدانا مرۆڤان قه‌بویل ناكه‌ت مرۆڤ ناڤ و پاشناڤان بۆ كه‌سان دانیت. له‌و مه ژ مێژه بریارا خوه یا دای كۆ ئێدی پاشناڤێ شاشێ “نالبه‌ند” بكارنه‌ئینین.
ژێده‌ر و ڕۆنكرن:
١. بنێره پێشه‌كییا سادق بهائه‌ددین ئامێدی بۆ دیوانا(ئه‌حمه‌دێ نالبه‌ند – موخلص) خالد حسێن ١٩٧٢ و (هۆزانڤانێت كورد سادق بهائه‌ددین ئامێدی بپ٥٣٣)
٢. ئه‌حمه‌د ئه‌مین: ل هه‌ر جهه‌كی د نڤیسا ڤی بابه‌تی دا هات بیت، مراد پێ ئه‌حمه‌دێ موخلصه.
٣. بنێره هه‌ر سێ به‌رگێن دیوانێن ئه‌حمه‌دێ موخلص یێن خالد حسێنی چاپكرین.
٤. بنێره “به‌رپه‌ره‌ك ڤه‌شارتی ژ ژینا نالبه‌ندی تاها مایی ١٩٩٤”
٥. بنێره دو دیوانێن “ئیسماعیل بادی” و یا “ره‌شید فندی”، هه‌روه‌سان “درباس مسته‌فا”ی ژی به‌س نالبه‌ند بكارئینایه. بۆ زانین: “ئیسماعیل بادی” ئێكه‌م جار ئه‌حمه‌دێ موخلص (نالبه‌ند) بكارئینایه و پاشی “ئه‌حمه‌دێ نالبه‌ند” ب تنێ بكارئینایه.
٦. دیوانان (ئه‌حمه‌دێ موخلص ماهر عبدالرحمن به‌رواری ٢٠١٣ بپ ٩٧-١٠٩)
٧. بنێره كونیێن ئه‌حمه‌دێ موخلص د دیوانا “ئه‌حمه‌دێ موخلص ماهر عبدالرحمن به‌رواری ٢٠١٣ به‌رپه‌رێن ١٠٦. ١٠٧، ١١٩، ١٢٠، ١٢١.
٨. بنێره نه‌قلانێ دیزاینا ئه‌حمه‌دێ موخلص یا دیوانا خوه (حدیقه الاكراد احمد مخلص) یێ د باغێ كوردا دا به‌رپه‌رێ ٥ دا هاتیه به‌لاڤكرن.
٩. بنێره ساتستیك و دیاگرامان د دیوانا “ئه‌حمه‌دێ موخلص ماهر عبدالرحمن به‌رواری ٢٠١٣ به‌رپه‌رێن ١٠٧، ١٠٨ هه‌روه‌سان به‌رپه‌ڕێ ١٢٢.
١٠، بنێره دیزاین و ده‌ستنڤیسێ دیوانا “حدیقه الاكراد احمد مخلص” یێ د دیوانا باغێ كوردادا به‌رگێ ١ لاپه‌ڕێ ٢ هاتیه به‌لاڤكرن هه‌روه‌سان من د دیوانا “ئه‌حمه‌دێ موخلص ماهر عبدالرحمن به‌رواری ٢٠١٣ به‌رپه‌رێ ٦٠٨ )دا به‌لاڤكریه.
١١. بنێره دیوانا”باغێ كوردا به‌رگێ١ لاپه‌ره ٣٠ و ٥٣٠ و هه‌ڤبه‌ركه.
١٢. بنێره دیوانێن ڤان سالێن بۆری ل سه‌ر ئه‌حمه‌دێ موخلص ژ لایێ به‌رێزان (ئیسماعیل بادی و ره‌شید فندی) ڤه هاتینه چاپكرن، بادی د دیوانه‌كێ دا (ئه‌حمه‌دێ موخلص- نالبه‌ند” بكاردئینیت هه‌روه‌كی پێشنیارا مه و یا دووماهیێ ڤه‌گه‌رایه سه‌ر ره‌ئیا جامێران و “موخلص” یێ ژێ هاڤێتی.
ناڤبری د به‌رسڤا كاك شیان كانیساركی دا (رۆژناما ئه‌ڤر و هژمار ٣٠٨٦ یا ڕۆژا ١٩.١.٢٠٢٢)دا نه‌راسته‌وخوه ئیشاره‌تێ دده‌ته كه‌سان كو نازناڤێ ئه‌مینی بكارئینایه بۆ “ئه‌حمه‌دێ موخلص”، وه‌سان یا دیاره ته‌ركیزا وی یا كێم بووی و ژ ڕاستیان د ره‌ڤیت و حه‌ساسیا ب هنده‌ك ناڤ و كتێبان هه‌ی و نكاریت د نڤیس و كتێبێن خوه دا ئیشاره‌تێ بده‌تێ وه‌ك ژێده‌رێن بابه‌تی.
یا خویایه كو “ئه‌مین” نه پاشناڤه لێ ناڤێ بابێ “ئه‌حمه‌دێ موخلصه” و مه د دیوانا خوه دا””ئه‌حمه‌دێ موخلص ماهر عبدالرحمن به‌رواری ٢٠١٣ به‌رپه‌رێن ٩٧-١٢٢ و فه‌لسه‌فا ژیانێ ئه‌حمه‌دێ موخلص(نالبه‌ند) ماهر عبدالرحمن به‌رواری ٢٠١٩به‌رپه‌رێن ١١-١٤) هه‌می زه‌لال كرینه وه‌ك ناڤێ سیانی و پاشناڤێ جهی و هه‌لبه‌ستی(ئانكو كامل ناڤێ سیانی و پاشناڤێن وی ب ڤی ڕه‌نگی:
“ئه‌حمه‌د موخلصێ (ئه‌مینێ نالبه‌ندێ) محه‌مه‌دێ ئامێدی”
ده‌رباره‌ی ڕه‌خنه‌گرێ خودان شیان (شیان كانیساركی) ژی دبێژیت : شیان د بن باندۆرا كه‌سان دا ڤان نڤیسان دنڤیسیت (ئانكو نالبه‌ندی ب شاش و موخلصی ب ڕاست ددانیت)، دڤێت بزانیت، شیان و پرانیا نڤیسه‌ڤانان خودان شیان و بیر و بریار و دیتنێن خوه‌نه و دزانن ڕژدی و ئه‌كادیمی و ئه‌مانه‌تا ڤه‌گوهازتنا دیكۆمێنتان د نڤیس و كتێبێن من دا یا هه‌ی و ب شه‌هده‌ییا چه‌ندان دكتۆر و كاك شیانی ژی دیوانا من “ئه‌حمه‌دێ موخلص ماهر عبدالرحمن به‌رواری ٢٠١٣” ل ئاستێ دكتۆرایه و تا نوكه ئه‌كادیمیترین و باشترین كتێبه ل سه‌ر ژیان و به‌رهه‌مێ “ئه‌حمه‌دێ موخلص” هاتییه چاپكرن و وی ب خوه ژی د پێشه‌كیا وێ دا ئیشاره‌تا دایێ.
١٣. مه‌لا تاها مایی، د به‌رگێ ئێكێ لاپه‌رێن (١١-٥٠) دا به‌حسێ خوه دكه‌ت كا چه‌ند پێڤه كه‌سیره بوویه و هه‌می شعر ئاماده‌كرینه و فه‌هره‌ست ژی بۆ حازركرینه، د لاپه‌رێ ٤٩ و ٥٠ یێ دا، ب باوه‌ر ب خوه بوون دبێژیت: د ڤی كاری دا گه‌له‌ك كێمی دێ هێنه دیتن، لێ ئه‌ڤه من پێ چێ بوو و داخوازا لێبۆرینێ ژ شاشیان دكه‌ت، هه‌روه‌سان ژ نفشێن نوی دخوازیت وان شاشیان چاره‌سه‌ر بكه‌ن.
