ئه‌حمه‌د تورك:پرسا كوردی بوویه ژێده‌رێ هه‌موو قه‌یرانێن نها ل توركیا
ئه‌ڤرۆ:
سیاسه‌تمه‌داره‌كێ باكورێ كوردستانێ دیار دكه‌ت كو هه‌تا پرسا كوردی ل توركیا نه‌هێته چاره‌سه‌ركرن دێ قه‌یرانا ئابووری و سیاسی ل توركیا ژی هه‌ر یا به‌رده‌وام بیت، چونكو د راستی دا ئاشكرایه پرسا كوردی و نه‌چاره‌سه‌ركرنا وێ بوویه ئه‌گه‌رێ هه‌موو قه‌یرانێن نها ل توركیا.
ئه‌حمه‌د تورك سیاسه‌تمه‌دارێ ناڤدارێ باكورێ كوردستانێ بۆ ده‌زگه‌هێن راگه‌هاندنا توركیا دیار كر كو ده‌مه‌كه پارتا كۆماریا گه‌ل به‌حسێ چاره‌سه‌ركرنا پرسا كوردی دكه‌ت، لێ چاره‌سه‌ركرنا پرسا كوردی تنێ ب ئاخڤتنێن خوه‌ش نابیت، چونكو به‌ری نها چه‌ندین جاران ئه‌ردۆغانی ژی خواست ب رێیا ئاخڤتنێن خوه‌ش و هنده‌ك تشتێن وه‌سا كوردان بخاپینیت و د ئه‌نجام دا ئاشكرا بوو كو ده‌ستهه‌لاتا توركیا چو به‌رنامه بۆ چاره‌سه‌ركرنا پرسا كوردی نینن، چونكو پرسا كوردی ب رێیا ڤه‌كرنا كه‌ناله‌كێ كوردی و چه‌ند ده‌زگه‌هێن كه‌لتوری ناهێته چاره‌سه‌ركرن، كورد وه‌لاتیێن توركیا نه ل سه‌ر ئاخا خوه دژین و دڤێت كورد ژی وه‌كو وه‌لاتیێن دی یێن توركیا خوه‌دانێ هه‌مان ماف بن، هه‌تا ئه‌و یه‌ك نه‌هێته كرن بێگومان پرسا كوردی ژی ناهێته چاره‌سه‌ركرن و گۆت: (ده‌ستهه‌لاتا ئه‌ردۆغانی و یێن به‌ری وی ژی ب هه‌موو ره‌نگه‌كێ بزاڤا هندێ كرن كو ب شه‌ری پرسا كوردی ل گۆر خوه چاره‌سه‌ر بكه‌ن، لێ شه‌ری ژی توركیا تووشی قه‌یرانێن مه‌زن یێن ئابووری كرن و نها ژی توركیا د قه‌یرانه‌كا گه‌له‌ك مه‌زن یا ئابووری دایه، ژ به‌ر هندێ ژی چه‌ندین سالان به‌ری نها مه گۆت و دیسان ژی دبێژم كو ب جهێ هوون وان پاران بۆ شه‌ری ته‌رخان دكه‌ن پرسا كوردی چاره‌سه‌ر بكه‌ن و بلا ئه‌و هه‌موو پاره بۆ ئاڤه‌دانیێ بهێته ته‌رخان كرن و وی ده‌می بێگومان دێ توركیا گه‌له‌ك بهێز كه‌ڤیت و چو قه‌یران ژی نامینن).
ناڤهاتی ئه‌و یه‌ك ژی دیار كر كو ژ به‌ر نه‌چاره‌سه‌ركرنا پرسا كوردی و بزاڤێن شاش یێن حوكمه‌تێن توركیا د ماوه‌یێ چه‌ندین سالێن بۆری دا توركیا تووشی قه‌یرانێن مه‌زن یێن سیاسی و ئابووری هاتیه، ژ به‌ر هندێ ژی هه‌تا پرسا كوردی ل توركیا نه‌هێته چاره‌سه‌ركرن و كورد ژی نه‌گه‌هنه مافێن خوه یێن ره‌وا توركیا نه‌شێت خوه ژ قه‌یرانێن نها هه‌ی قورتال بكه‌ت، یێن به‌ری ئه‌ردۆغانی نه‌شیان و ئه‌ردۆغان ژی نه‌شێت، چونكو ب شه‌ری پرسا كوردی ناهێته چاره‌سه‌ركرن، شه‌رێ چه‌ندین سالێن بۆری ب سه‌رێ خوه توركیا تووشی گه‌له‌ك قه‌یرانان كریه و مخابن ده‌ستهه‌لاتدارێن توركیا چو وانه ژ ئه‌زموونێن بۆری وه‌رنه‌گرتینه و دیسان ژی ل سه‌ر رێیه‌كا شاشن و دخوازن ب ژناڤبرنا كوردان و بێده‌نگكرنا گه‌لێ كورد ل گۆر خوه پرسا كوردی چاره‌سه‌ر بكه‌ن، لێ ژ به‌ر بزاڤێن وان یێن شاش ئه‌ڤرۆكه توركیا د قه‌یرانه‌كا گه‌له‌ك مه‌زن یا ئابووری و سیاسی دایه و وه‌لاتی ژ ده‌ستهه‌لاتێ بێ هێڤی بووینه.
ئه‌حمه‌د تورك د دووماهیا ئاخڤتنا خوه دا ئه‌و یه‌ك ژی دیار كر كو هه‌تا ئۆپۆزسیۆنا نها یا توركیا به‌رنامێ خوه بۆ چاره‌سه‌ركرنا پرسا كوردی ئاشكرا نه‌كه‌ت كورد ژی پشته‌ڤانیێ ل وان ناكه‌ن، ئه‌ڤرۆكه ل توركیا چو هێزه‌ك بێی كوردان نه‌شێت ببیته ده‌ستهه‌لاتدار و كورد ژی ئێدی وه‌كو به‌رێ بێی مه‌رج پشته‌ڤانیێ ل چو ئالیه‌كێ ناكه‌ن، ژ به‌ر هندێ ژی دڤێت پارتا كۆماریا گه‌ل و پارتێن دی ب جهێ ئاخڤتنێن خوه‌ش به‌رنامێ خوه بۆ چاره‌سه‌ركرنا پرسا كوردی ئاشكرا بكه‌ن دا بۆ هه‌ر كورده‌كێ ل توركیا ئاشكرا بیت كا دێ پارتا كۆماریا گه‌ل و هه‌ڤالبه‌ندێ وێ چ كه‌ن.
