ئه‌حمه‌د مشه‌ختی: راهێنه‌رێن كورد و سویدی مژوولی دروستكرنا كه‌ڤاله‌كێ نوو یێ هونه‌رێ مللی نه
ئه‌ڤرۆ، هه‌رهین محه‌مه‌د:
ئه‌حمه‌د مشه‌ختی، سه‌رۆكێ تیپا دهۆك یا هونه‌رێ مللی دیار كر كو ئه‌و مژوولی پرۆژه‌كی نه دناڤبه‌را شاندێ سویدی و په‌یمانگه‌ها گۆت یا ئه‌لمانی دا بۆ پێشڤه‌برنا به‌هره‌یێن هونه‌رێ مللی ئه‌ڤ پرۆژه سێ قووناغان ب خوه ڤه دگریت و دو قووناغێن ده‌سپێكێ نه و پاشان دێ كونسێرته‌ك هێته گێران بۆ وان گه‌نجێن به‌هره‌مه‌ند دبوارێ مۆزیكێ دا و ژ لایێ مۆزیكژه‌نیێ و ستران گۆتنێ ڤه وان هزر د ڤی پرۆژه‌ی دا كریه كو پێشكێشی وان بكه‌ن، چونكو دده‌مێ بوری دا چ ده‌لیڤێن خوه‌ش نه‌بووینه ب تایبه‌تی بۆ ته‌خا گه‌نجان كو كاربكه‌ن د وارێ مۆزیكێ و هونه‌رێ مللی دا، ژ به‌ر كو ته‌كنه‌لۆژیایێ كارتێكرنه‌كا مه‌زن ل سه‌ر مێشكێ گه‌نجی كریه، له‌ورا وان بزاڤكریه نیشاندانه‌كێ پێشكێش بكه‌ین و هێدی هێدی گه‌نجی ڤه‌گه‌ڕیننه ڤه پشكداری بزاڤ و چالاكیان بیت.
ناڤهاتی بۆ به‌رپه‌رێ هونه‌ری یێ رۆژناما ئه‌ڤرۆ گۆت: به‌ری سێ سالان ژی وی شاندی سه‌ره‌دانا مه كربوو وه‌كو گرێبه‌سته‌ك دناڤبه‌را مه و پارێزگه‌ها دهۆكێ و باژێرێ یوتوبوری ل سویدێ دا هه‌بوو وه‌كو پرۆژه‌كێ ئالوگوری كه‌لتوری بۆ و ئه‌ڤ قووناغا ئالوگوری كه‌لتوری قووناغه‌ك ده‌رباس كربوو قووناغا دووێ و ئه‌م وه‌سا رێكه‌فت بووین و هه‌ر بزاڤ چالاكیه‌كا بهێته‌كرن دوارێ مودرێناتیێ دا و دێ بزاڤان كه‌ین كاره‌كێ هه‌ڤپشك بكه‌ین دناڤبه‌را مه وان دا و ئه‌ڤ پرۆژه كه‌تیه دوارێ جێبه‌جێكرنێ دا و مه بزاڤ كریه هه‌ڤالێن مه یێن سویدی ژی بهێنه د هێلێ دا و ئه‌و ژی پشكدارببن و هه‌ر پشكداریه‌كا هه‌ڤالێن مه یێن سویدی ل گه‌ل مه دا دكه‌ن ب پالپاشتیا بالیۆزخانا سویدی یه كو پشكداری ڤی پرۆژه‌ی بن ل باژێرێ دهۆكێ، ئه‌ڤ پرۆژه دێ بیته پره‌ك دناڤبه‌را مه و وه‌لاتێ سویدی دا و دێ بیته پره‌كا هزری و ره‌وشه‌نبیری كه‌لتوری یا ئالوگور دناڤبه‌را باژێرێ دهۆكێ و وه‌لاتێ سویدێ دا، هه‌روه‌سا دێ هه‌موو بزاڤان كه‌ین ڤێ پرێ موكومتر لێ بكه‌ین و به‌رده‌وامیێ بده‌ینێ بۆ وێ چه‌ندێ بشێن پتر كارێن هه‌ڤپشك ئه‌نجام بده‌ین و نوكه ژی راهێنه‌رێن كوردی و سویدی مژوولی وێ چه‌ندێ نه كه‌ڤاله‌كی دروست بكه‌ن كو كه‌لتۆرێ كوردی و سویدی ب خوه‌ڤه بگریت و وی كه‌ڤالی ل دهۆكێ و سویدێ نیشابده‌ین و ره‌نگ ڤه دانا خوه هه‌بیت.
