ئه‌ردۆگان داخوازه‌كا بایدنی ب توندی ره‌ت دكه‌ت
سه‌رجان مه‌حمود:
جۆ بایدن سه‌رۆكێ ئه‌مریكا و ره‌جه‌ب ته‌یب ئه‌ردۆگان سه‌رۆك كۆمارێ توركیا ل باژێرێ بروكسه‌ل یێ پایته‌ختێ به‌لجیكا كۆمبوون و بابه‌تێن وه‌ك، كڕینا سیسته‌مێ موشه‌كی یێ روسیا ژ ئالیێ توركیا ڤه، بابه‌تێ فرۆكێن شه‌ری یێن F35، ره‌وشا كوردێن سووریێ، هه‌بوونا هێزێن ده‌وله‌تا تورك ل پشكه‌كا ئاخا سووریێ و ره‌وشا مافێن مرۆڤی و دیموكراسیێ ل توركیا هاتنه گه‌نگه‌شه كرن.
ده‌زگه‌هێن راگه‌هاندنێ دیار دكه‌ن كو د هه‌ڤدیتنێ دا سه‌رۆك بایدن ژ ئه‌ردۆگانی خواست كو سیسته‌مێ موشه‌كی یێ روسیا بكه‌ته ژێر كۆنترۆلا ناتۆ، لێ ئه‌ردۆگانی ئه‌و یه‌ك ره‌ت كر و ل هه‌مبه‌ر دا ژی جۆ بایدن ژی دیار كر وی ده‌می توركیا ژی نه‌شێت د پرۆژێ فرۆكێن مودێرن یێ F35 دا جه بگریت.
ل گۆر ده‌زگه‌هێن راگه‌هاندنێ د پشكه‌كا دی یا هه‌ڤدیتنێ دا ره‌وشا كوردێن سووریێ هاته گه‌نگه‌شه كرن و ئه‌ردۆگان ژ بایدنی خواست ئه‌مریكا پشته‌ڤانیا هێزێن كوردی نه‌كه‌ت و یه‌په‌گێ وه‌ك هێزه‌كا تیرۆرست قه‌بوول بكه‌ت لێ ئه‌ڤ داخوازیا ئه‌ردۆگانی ژ ئالیێ بایدنی ڤه هاته ره‌ت كرن و بایدن ئاشكرا كر ئه‌و ل دژی تیرۆرستان پشته‌ڤانیا هێزێن كورد ل سووریێ دكه‌ن و راگه‌هاند كو ئه‌و دخوازن سووریه‌كا دیموكرات و ئازاد ژ نوو ڤه بهێته دروست كرن و داخواز ژ توركیا ژی كریه كو ئاسته‌نگیان ل هه‌مبه‌ر ئاڤاكرنا سووریایه‌كا نوو دروست نه‌كه‌ت.
