ئه‌رێ ئه‌م هه‌ر ئه‌و كوردین یێن به‌ری چه‌ند سالان؟
حسێن تاها هرۆرى
ئه‌و رۆژێن دلخوه‌شكه‌ر و نه‌هێنه‌ژبیركرن ئه‌و رۆژێن گه‌شبوون بۆ كوردان د شه‌رێ ل دژی داعه‌شێ دا، ئه‌و رۆژێن د دیرۆكا كوردستانێ دا ب زێرێ دهێنه نه‌خشاندن و تۆماركرن، ئه‌و رۆژ بوون یێن هه‌می هێزێن كوردستانی پیكڤه ل دژی دژوارترین تیرۆرا ڤی سه‌رده‌می به‌رخوه‌دان كری و تیرۆر شكاندی و داستانێن مه‌زن ل سه‌ر وان تۆماركرین، ئه‌و هه‌ڤگرتنا نه‌راسته‌وخوه یا هێزێن كوردستانی كو هه‌ر لایه‌نه‌كی ل به‌ره‌یێن جودا به‌ره‌ڤانی ژ ئاخ و ملله‌تێ كوردستانی دكر، هه‌ر وه‌كو دیار هه‌ر هێزه‌كێ مه‌ره‌م و نیازێن خوه یێن تایبه‌ت هه‌بوون و ل به‌ر به‌رژه‌وه‌ندیێن خوه دگه‌ریان، لێ یا گرنگ و خالا هه‌ڤپشك د ناڤبه‌را وان دا ئه‌و بوو ئارمانجا هه‌میان ئێك بوو بۆ ژ ناڤبرنا تیرۆرێ، هۆكارێن سه‌ره‌كی یین سه‌ركه‌فتنا كوردان ل سه‌ر داعه‌شێ د ڤێ خالی دا بوو، مخابن هاتنا داعه‌ش گه‌له‌ك زیانێن مه‌زن گه‌هاندنه كوردان كورد بوونه قوربانیێن ئێكێ یێن شه‌ڕێ داعه‌ش، لێ دڤێت ئه‌م وێ ژی ژبیرنه‌كه‌ین پشتی ژ ناڤچوونا كۆمارا مهابادێ و هه‌تاكو سه‌رده‌مێ داعه‌ش جارا ئێكێ بوو كوردێن هه‌رچار پارچه‌یێن كوردستانێ هۆسا هه‌ڤبگرن و پێكڤه ل دژی دوژمنه‌كێ درنده شه‌ڕی بكن، له‌و ما ئه‌ز دبێژم دیرۆكا كوردستانێ یا سه‌رده‌مێ داعش دێ ب چه‌ند خالێن زێری هێته نه‌خشاندن و ناهێن ژبیركرن، چه‌ند هه‌سته‌كا خوه‌ش بوو بۆ یه‌كه‌مین جار ده‌مێ په‌رله‌مانێ هه‌رێما كوردستانێ بریاره‌كا نیشتیمانی ده‌ركری و بریار دای پێشمه‌رگه بچنه كۆبانێ ژ بۆ پشته‌ڤانیا شه‌رڤانێن كۆبانێ ژ ده‌ستێن داعه‌ش ڕزگار بكن، یا ژ وێ هه‌ستێ هێژ خوه‌شتر ئه‌و بوو ده‌مێ سه‌رۆك بارزانی سه‌خترین دوژمنێ كوردان كو تركیا یه ڕازی كری كو پێشمه‌رگه د ناڤ ئاخا باكۆرێ كوردستانێ ڕا ده‌رباسی كۆبانێ ببن، گه‌لۆ ئه‌و رۆندكێن دلخوه‌شیێ یێن كوردێن هه‌ر چار پارچه‌یێن كوردستانێ باراندین ژ بۆ پێشمه‌رگه‌ی ده‌می ب چه‌كێن گران و مۆدێرن ڤه ژ پایته‌ختێ كوردستانێ هه‌ولێرێ برێكه‌فتین به‌ر ب كۆبانێ ڤه دێ هێنه ژبیركرن؟ ده‌مێ هیزێن پێشمه‌رگه‌ی گه‌هه‌شتینه ناڤ ئاخا باكۆرێ كوردستانێ مه هه‌میان دیت ئه‌و پێشه‌وازیا هند یا گه‌رم و مه‌زن و نه‌چاڤه‌رێكری یا كوردێن باكۆر ل وان پێشمه‌رگه‌یان هاته‌كرن، ژ سلۆپیا هه‌تا كو وێرانشه‌هرێ ب هزاران پیر، جان، زارۆك، ژن و مێر، هه‌می پێكڤه ڕژیان د ڕێیا پێشمه‌رگه‌یان دا ب ئالایێن كوردستانێ ب ده‌ستكێن گولان و دلێن شاد ڤه بێی كۆ پارته‌ك یان ڕێكخراوه‌ك وان بجڤینن هه‌ستێن وان یێن نه‌ته‌وه‌ی ئه‌و جڤاندن پیشه‌وازییا پێشمه‌رگه‌یان، ڕۆژه‌كا هند دلخوه‌ش و هه‌ست بلند بوو ژ شادیێ ڕۆندكان خوه دچاڤێن كوردێن دلسۆز دا نه‌دگرت، كاره‌كێ چه‌ند پیرۆز بوو ل بن چاڤدێریا سه‌رۆكاییا هه‌رێما كوردستانێ ڕێكه‌فتنا دهۆكێ یا لایه‌نێن سیاسی یێن ڕۆژئاڤایێ كوردستانێ د ناڤبه‌را ئه‌نجوومه‌نا نیشتیمانی یا كوردێن سووریێ و پارتییا یه‌كێتیا دیمۆكرات دا په‌یمانه‌ك ئیمزا كر ل سه‌ر سێ خالێن گه‌له‌ك گرنگ پێكهاتن (ئاڤاكرنا كۆنسه‌یه‌كا بریارده‌ر، ئاڤاكرنا ئیداره‌یه‌كا هه‌ڤبه‌ش و ئاڤاكرنا هێزه‌كا هه‌ڤبه‌ش) ئه‌ڤ هه‌ر سێ خاله ئه‌و بوون ئاگرێ ناكوكیێن دژوار د ناڤبه‌را كوردێن رۆژئاڤا دا ڤه‌مراندین و دلێ هه‌ر كورده‌كی پێ خوه‌ش بووی، گه‌لۆ ما ئه‌م نه هه‌ر ئه‌و كوردن یێن به‌ری چه‌ند سالان، كا ئه‌و هه‌ستا نه‌ته‌وه‌یی، كینه ئه‌و هه‌ست د سه‌رێ كوردان دا لاوازكرین، یان هۆكارێن لاوازبوونا وان هه‌ستان چنه؟ بۆچی په‌رله‌مانێ كوردستانێ بتنێ وێ جارێ ئه‌و بریارا نیشتیمانی ده‌ركر و چك بوو ڤه وه‌كی هێكا دیكلی بتنێ بوو جاره‌ك، بۆچی سه‌رۆكاتیا هه‌رێمێ ب رۆلێ پرسێن نیشتیمانی رانابیت و بزاڤێ بۆ هه‌ڤگرتنا لایه‌نێن كوردستانی ب رژدی ناكه‌ت؟ ئه‌و هه‌ڤگرتن و دلخوه‌شی یه و هه‌ستا نه‌ته‌وه‌یی بۆچی بۆ هه‌ر و هه‌ر به‌رده‌وام نابیت و بمینیت؟ گه‌لۆ كی هه‌یه ڤێ حه‌زنه‌كه‌ت یان رۆژێن خوه‌ش بدنه ب یێن نه‌خوه‌ش، ئه‌و نه ئارێشه‌یه هه‌ر پارته‌ك ل سه‌ر به‌رژه‌وه‌ندیێن خوه كاربكه‌ت، لێ یا گرنگ ئه‌وه ل سه‌ر پرسێن نیشتیمانی د هه‌ڤگرتی بن، خودان ئێك هه‌لویست بن ل دژی پلانێن دوژمنان، هه‌ر لایه‌نه‌كێ كوردستانی ل دژی به‌رژه‌وه‌ندییا كوردستانێ بت، لایه‌نێن دی هه‌می پێكڤه ل دژ بن و خودان ئێك بریار بن، هه‌كو ئه‌ڤه هاته كرن، نه دوژمن و نه هیچ لایه‌نه‌كێ شاش نه‌شێت زوو ب زوو مایێ خوه د كوردستانێ دا بكه‌ت، هیڤیا مه ئه‌وه ئه‌و هه‌ڤگرتنا كوردان و هیڤی و ئۆمێدێن وان یێن به‌رێ بزڤرنه ڤه و هه‌ر لایه‌نه‌ك ژ لایێ خوه‌ڤه سازانێ بۆ به‌رژه‌وه‌ندیا گشتی بكه‌ت.
