ئهرێ ریفراندۆم دێ ئێتهكرن ؟
ئهرێ ریفراندۆم دێ ئێتهكرن یان نه؟ بۆ ماوهیهكی ئهڤه پرسیارا جادا كوردستانێ یه، و هێشتا كهسێ پشتراست نهكریه كا دێ ئێته كرن و كهنگی و چهوا؟، بهلێ سهركردایهتیا سیاسی یا كوردی جار جار بابهتێ رێفراندۆم و سهربهخویێ گهرم دكهت و جارهكا دی خوه بێ دهنگ دكهت و دهێلیته ب هیڤیا خهلكی ڤه، ههر وهكی شهرم ژ بابهتی دكهن یان دڤێت وهك كارتهك دژی ههڤدو بكاربینن، ژبیر دكهن ریفراندۆم گهر بابهتهكێ رژد نهبیت و پێنگاڤێن پراكتیكی بۆ نهئێنه هاڤێتن وی دهمی چ رامانا خوه نادهت و ب تنێ دێ درووشم بیت.
ریفراندۆم بابهتهكێ نهتهوهیی یه و گرێدایی چارهنڤێس و پاشهرۆژا گهلێ كوردستانێ یه، لهو دڤێت سازیهكا فهرمی یا حكومهتێ پێ راببیت و كار ل سهر بكهت، نه پارتهكا سیاسی ب پرۆژێ خوه بزانیت و لیژنهیا پێك بینیت و سهرهدانا لایهنێن سیاسی بكهت، یا خویایه چ جارهكێ پارتێن سیاسی ههمی ناچنه ژێر بار و بریارێن پارتهكێ یان كهسهكی ڤه، نهخاسم بۆ بابهتهكێ نهتهوهیی كو ههر ئێكی دڤێت خوه لێ بكهته خودان.
رۆلێ حوكمهتێ چی یه د رێكخستن و برێڤهبرنا ریفراندۆمێ دا؟ كی دێ بریارا ئهنجامدانێ دهت و پالپشتیێ ل سهر چ كهت؟ ئهنجامێن ریفراندۆمێ كی دێ پهسهند كهت؟ بریارا د دووڤ دا دێ چ بیت؟ كی دێ پێگیریێ پێ كهت؟ ههر دهمێ بهرسڤا ڤان پرسیاران ههمیان روون بوو، وی دهمی بلا ریفراندۆم بهێتهكرن و دێ یا ب بهرههم بیت و گههیته مهبهستێ ژی.
زڤرینا كوردان بۆ بهغدا و بهردهوامیدان ب ئێكهتیا ئاخا عیراقێ، نیشانهكه كو ههرێم نهیا رژده دهربارهی ریفراندۆمێ. زێدهباری ئاریشێن نهبوونا بۆدجهی و ل دهمێ بۆدجه ههبووی كۆمۆسیۆن هێشتا نههاتیه دامهزراندن و گهر كۆمۆسیۆن هاته دامهزراندن ژی بۆ ههر كارهكی شهش ههیڤ دڤێن بۆ بهرههڤیا و ب ڤی دهست و داری ههتا سالهكا دی ژی ریفراندۆم نائیته كرن!.
